Бізнес-навіны

БЕЛАЗ стварыў доследны ўзор новага 25-тоннага самазвала-землявоза

Фота з архiва

7 лютага, Мінск /Кар. БЕЛТА/. У лінейцы 25-тонных самазвалаў павышанай праходнасці з жорсткай рамай серыі МаАЗ-7505 важкае папаўненне - у філіяле БЕЛАЗа ў Магілёве створаны доследны ўзор мадэлі МаАЗ-75053 з дызельным рухавіком магутнасцю 380 к.с., паведамілі БЕЛТА ў прэс-службе беларускага аўтазавода.

"Гэта паўнапрывадная машына, якая з'яўляецца мадыфікацыяй самазвала-землявоза МаАЗ-75050, прызначана для перавозкі насыпных грузаў у будаўніцтве і на раскрыўных работах гарнаруднай прамысловасці пры бездарожжы і ў складаных кліматычных умовах", - адзначыў начальнік КБ агульных кампановак аддзела галоўнага канструктара падземнай і будаўніча-дарожнай тэхнікі НТЦ імя Ягорава Ягор Мацукоў.

Самазвал вызначае ўдасканаленая канструкцыя кузава, якая забяспечвае абарону ад намярзання і поўную выгрузку вільготнага грунту, ГМП з аўтаматычным кіраваннем, бяспечная і камфортная для аператара кабіна з палепшанымі эрганамічнымі ўласцівасцямі і сістэмай дыягностыкі, якая адлюстроўваецца ў рэжыме рэальнага часу на электроннай панэлі прыбораў.

БЕЛАЗ выкарыстоўвае ўсе магчымасці для максімальнай лакалізацыі вытворчасці камплектуючых кар'ернай тэхнікі, робячы стаўку на імпартазамяшчэнне. Абсалютная большасць вузлоў і камплектуючых у МаАЗ-75053 айчыннай або расійскай вытворчасці.

"Цяпер доследны ўзор самазвала праходзіць працэдуру адаптацыі сілавой устаноўкі, неабходных дапрацовак канструктарскай дакументацыі, дэталей і вузлоў. Затым МаАЗ-75053 чакаюць тыпавыя завадскія выпрабаванні і этап эксплуатацыйных выпрабаванняў на адным з прадпрыемстваў, зацікаўленых у пастаўцы аналагічнай тэхнікі", - расказаў Ягор Мацукоў.

ААТ "БЕЛАЗ" - кіруючая кампанія холдынга "БЕЛАЗ-Холдынг" - буйнейшы сусветны вытворца кар'ерных самазвалаў і транспартнага абсталявання для горназдабыўной і будаўнічай прамысловасці. Займае каля 30 працэнтаў сусветнага рынку кар'ерных самазвалаў асабліва вялікай грузападымальнасці. Вырабляе самы буйны ў свеце кар'ерны самазвал грузападымальнасцю 450 т.

версія для друку

зрабіць стартавай

дабавіць у выбранае