Бізнес-навіны

4 верасня, Гомель /Валерый Сідорчык - БЕЛТА/. РУП "Вытворчае аб'яднанне "Беларуснафта" гатова ўзяць на сябе функцыі нацыянальнага сеткавага аператара па зарадцы электрамабіляў, паведамілі карэспандэнту БЕЛТА ў прэс-службе кампаніі.

На сёння ў сетцы АЗС "Беларуснафта" функцыянуюць восем зарадных станцый для электрамабіляў, тры з іх уведзены ў мінулым месяцы - дзве ў Гомельскай вобласці і адна ў Гродзенскай.

Дзве новыя гомельскія станцыі хуткай зарадкі (АЗС нумар 20 і нумар 59) маюць тры самыя распаўсюджаныя канектары (вілкі). Гэта Type 2 для зарадкі пераменным токам са сярэдняй скорасцю (рэжым Mode 3), CCS і CHAdeMO для хуткай зарадкі пастаянным токам (рэжым Mode 4). У Гродзенскай вобласці станцыя размешчана на АЗС нумар 84 (291 км а/д М6, паблізу пагранічнага пераходу "Брузгі"). Яна прызначана для экспрэс-зарадкі - за 15-30 мінут да 80 працэнтаў батарэі. Зараджацца тут можна па стандартах Mode-4 і Mode-3, па трох раздымах - пастаянным токам CHAdeMO і CCS, пераменным токам па раздыме Type 2 AC.

Месцы ўстаноўкі зарадных станцый выбіраліся з улікам перспектыў развіцця электрамабільнага транспарту. Да канца 2017 года плануецца ўвесці ў эксплуатацыю на тэрыторыі краіны яшчэ сем зарадных станцый для электрамабіляў.

Паводле слоў намесніка генеральнага дырэктара "Беларуснафты" Андрэя Коціка, кампанія гатова выступіць у якасці нацыянальнага сеткавага аператара па зарадцы электрамабіляў і стварыць адпаведную інфраструктуру. Для гэтага плануецца да пачатку 2021 года стварыць 40 электразарадных станцый - з адлегласцю паміж імі 50 км. Гэта дасць магчымасць "закрыць" усе асноўныя магістралі Беларусі, забяспечыўшы зручнасць у перамяшчэнні электратранспарту", - адзначыў ён.

Вытворчае аб'яднанне "Беларуснафта" з'яўляецца буйнейшым аператарам Беларусі ў сферы рознічнага гандлю нафтапрадуктамі і мае самую разгалінаваную сетку аўтамабільных заправак у Беларусі. Цяпер іх налічваецца больш за 560. Праз гэту сетку рэалізуецца звыш 70 працэнтаў аўтамабільнага паліва ў краіне.