Бізнес-навіны

Беларускую харчовую прадукцыю прадставяць на выстаўцы ІНАПРАМ

Фота з архiва

5 ліпеня, Мінск /Кар. БЕЛТА/. Беларускую харчовую прадукцыю прадставяць на выстаўцы ІНАПРАМ, паведамілі карэспандэнту БЕЛТА ў Міністэрстве сельскай гаспадаркі і харчавання.

"Нягледзячы на тое, што ІНАПРАМ - прамысловая выстаўка, беларускім бокам будзе арганізаваны кірмаш-фестываль, у якім прымуць удзел тры прадпрыемствы, якія спецыялізуюцца на вытворчасці прадуктаў харчавання. Так, кампанія "Дамачай" прадставіць кандытарскія вырабы (пернікі, пячэнне, слоеныя, мучныя вырабы), Мінскі малочны завод нумар 1 - малочную прадукцыю, элітныя сыры, а ААТ "Гродзенскі мясакамбінат" - шырокую лінейку мясных далікатэсаў. У асартыменце будуць сыравэнджаныя і сыравяленыя каўбасы, а таксама дзіцячая лінейка мясных вырабаў. Акрамя таго, на выстаўцы гэтыя прадпрыемствы арганізуюць дэгустацыю прадстаўленай прадукцыі", - расказалі ў Мінсельгасхарчы.

Па выніках 2022 года тавараабарот харчовых тавараў і сельскагаспадарчай сыравіны паміж Беларуссю і Свярдлоўскай вобласцю Расійскай Федэрацыі склаў $90,7 млн (тэмп росту да ўзроўню 2021 года 170 працэнтаў). У тым ліку экспарт - $84,6 млн (тэмп росту 172,7 працэнта), імпарт - $6,1 млн (тэмп росту 140,5 працэнта).

Асноўныя пазіцыі экспарту - малако і малакапрадукты (у структуры экспарту 69,7 працэнта), у іх ліку сыры і тварог, масла сметанковае, ёгурт, кефір. Акрамя таго, пастаўляліся рыба і рыбапрадукты, солад, агароднінабахчавыя культуры і цукар.

"У 2022 годзе ў разы павялічыліся пастаўкі шакаладу, мучных кандытарскіх вырабаў, мясапрадуктаў. Пашырана наменклатура пастаўленай беларускай прадукцыі. Так, упершыню было пастаўлена каля 50 відаў тавараў. Акрамя таго, на рынак Свярдлоўскай вобласці пачаліся пастаўкі прадукцыі вытворчасці ЗАТ "Беларуская нацыянальная біятэхналагічная карпарацыя" прадуктаў, якія выкарыстоўваюцца для кармлення жывёл", - адзначылі ў ведамстве.

У Екацярынбургу адкрыта 13 магазінаў "Беларускія прадукты", у тым ліку чатыры - у 2022 годзе. Таксама беларускія харчовыя тавары рэалізуюцца ў гандлёвых сетках "Магніт" і "Пяцёрачка".

Асноўнымі імпартнымі пазіцыямі ў 2022 годзе сталі рыба і рыбапрадукты, жывая свойская птушка, прадукты для падрыхтоўкі соусаў і гатовыя соусы, макаронныя вырабы, алей.

"За студзень - красавік 2023 года тавараабарот харчовых тавараў і сельскагаспадарчай сыравіны паміж Беларуссю і Свярдлоўскай вобласцю склаў $28,2 млн (тэмп росту да ўзроўню студзеня - красавіка 2022 года 145,5 працэнта), у тым ліку экспарт - $25,1 млн (тэмп росту 141 працэнт), імпарт - $3,1 млн (тэмп росту 198,1 працэнта)", - падкрэслілі ў міністэрстве.

У гэтым годзе асноўнымі экспартнымі пазіцыямі з'яўляюцца малако і малакапрадукты, у тым ліку сыры і тварог, масла, ёгурт, кефір. Акрамя таго, экспартавалася кансерваваная рыба, солад, фрукты, агародніна і прадукты іх перапрацоўкі, шакалад, мясапрадукты і цукар. ЗАТ "Беларуская нацыянальная біятэхналагічная карпарацыя" пастаўляла ў расійскі рэгіён амінакіслоты. Асноўныя пазіцыі імпарту ў 2023 годзе - рыба і рыбапрадукты, алей, прадукты для падрыхтоўкі соусаў і гатовыя соусы, кураняты племянной гадоўлі.

"За студзень - красавік 2023 года ў параўнанні з аналагічным перыядам 2022 года пашырана наменклатура пастаўленай беларускай прадукцыі, у тым ліку ўпершыню пастаўлена 26 відаў", - запэўнілі ў Мінсельгасхарчы.

Прадукцыю ўласнай вытворчасці ў Свярдлоўскую вобласць у 2023 годзе пастаўлялі ААТ "АФПК "Жлобінскі мясакамбінат", ААТ "Ваўкавыскі мясакамбінат", ААТ "Савушкін прадукт", ААТ "Малочны свет", ААТ "Пастаўскі малочны завод", ААТ "Тураўскі малочны камбінат", ЗАТ "Беларуская нацыянальная біятэхналагічная карпарацыя", ААТ "Мажэліт".

Як расказалі ў ведамстве, у чэрвені бягучага года адбыўся візіт дэлегацыі Свярдлоўскай вобласці на чале з міністрам аграпрамысловага комплексу і спажывецкага рынку Свярдлоўскай вобласці Расійскай Федэрацыі Ганнай Кузняцовай. Дэлегацыя наведала Міжнародную сельскагаспадарчую выстаўку "Белагра-2023".

Па выніках візіту быў падпісаны План (Дарожная карта) супрацоўніцтва ў сферы сельскай гаспадаркі паміж Беларуссю і Свярдлоўскай вобласцю Расійскай Федэрацыі на 2023-2025 гады, у рамках якога прадугледжваецца павялічыць узаемны тавараабарот харчовых тавараў і сельскагаспадарчай сыравіны, пашырыць наменклатуру паставак прадукцыі; прапрацаваць магчымасць удзелу беларускага боку ў праектаванні на тэрыторыі Свярдлоўскай вобласці сучасных жывёлагадоўчых комплексаў і камплектаванні іх неабходным даільным, халадзільным і іншым абсталяваннем; прапрацаваць магчымасць паставак у Свярдлоўскую вобласць ветэрынарных прэпаратаў беларускіх вытворцаў, а таксама насення сельскагаспадарчых раслін беларускай селекцыі, уключаных у Дзяржаўны рэестр селекцыйных дасягненняў Расійскай Федэрацыі; прадоўжыць супрацоўніцтва па абмене вопытам у галіне агародніцтва закрытага грунту.

версія для друку

зрабіць стартавай

дабавіць у выбранае