Бізнес-навіны

Беларускую палетную дошку і рапсавы алей будуць экспартаваць у Кітай праз БУТБ

Фота з архiва

24 верасня, Мінск /Кар. БЕЛТА/. Дамоўленасць аб закупцы беларускіх піламатэрыялаў і прадукцыі перапрацоўкі алейных культур на біржавых таргах дасягнута па выніках сустрэчы з прадстаўніком кітайскай гандлёвай кампаніі "Шаньдун Люцын" у цэнтральным офісе Беларускай універсальнай таварный біржы, паведаміў карэспандэнту БЕЛТА прэс-сакратар БУТБ Раман Яніў.

"Бакі абмеркавалі бягучую сітуацыю на біржавым таварным рынку Беларусі, асаблівасці ўдзелу ў біржавых таргах для замежных кампаній, а таксама перспектыўныя напрамкі супрацоўніцтва. Сярод іншага, закрануты магчымасці інвесціравання ў беларускую лясную гаспадарку, парадак рэалізацыі вырабленых у Беларусі піламатэрыялаў, пытанні кантролю якасці і ўзровень развіцця транспартна-лагістычнай інфраструктуры", - сказаў Раман Яніў.

Акрамя прадукцыі перапрацоўкі драўніны (у прыватнасці, палетнай дошкі), кітайскі бок выказаў зацікаўленасць у набыцці на біржавой пляцоўцы і іншых запатрабаваных у Кітаі тавараў. Паводле слоў прадстаўніка "Шаньдун Люцын", павышаным попытам цяпер карыстаецца рапсавы алей. Гэта добрая магчымасць для беларускіх вытворцаў, каб выйсці на рынак КНР. Кітайскі бізнесмен адзначыў, што традыцыйна буйнейшым экспарцёрам рапсавага алею ў Кітай з'яўлялася Канада. Аднак з-за гандлёвага канфлікту, які зацягнуўся, пастаўкі гэтай прадукцыі прыкметна скараціліся. Дэфіцыт, што ўтварыўся, выклікаў рэкордны рост цэн. Таму цяпер Кітай актыўна шукае альтэрнатыўныя каналы закупак, і Беларусь можа стаць адным з іх.

Плануецца, што ўжо ў бліжэйшы час кампанія "Шаньдун Люцын" пройдзе працэдуру акрэдытацыі і пачне работу на БУТБ.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае