Бізнес-навіны

Беларускія вытворцы на выстаўцы ў Грузіі падпісалі 13 кантрактаў на пастаўку прадукцыі

27 сакавіка, Мінск /Кар. БЕЛТА/. Па выніках работы выстаўкі Made in Belarus, якая праходзіла ў Грузіі, падпісаны 13 кантрактаў на пастаўку айчыннай прадукцыі. Аб гэтым паведаміў сёння журналістам старшыня Беларускай гандлёва-прамысловай палаты Уладзімір Улаховіч, перадае карэспандэнт БЕЛТА.

Агульную суму заключаных кантрактаў кіраўнік БелГПП пакуль не назваў, спаслаўшыся на тое, што яна яшчэ не да канца выверана. Але, на яго думку, рэзультаты нацыянальнай выстаўкі можна лічыць паспяховымі.

Уладзімір Улаховіч у цэлым вельмі пазітыўна ацэньвае новы фармат правядзення маштабных экспазіцый Беларусі. "Made in Belarus - гэта пэўны стандарт паказу нашай прадукцыі, нашых стэндаў. Гэта новы краінавы фармат, які мы хочам і далей развіваць, - сказаў ён. - Мы пастаянна працуем над удасканаленнем падачы прадукцыі. Мала проста прыехаць і паўдзельнічаць. Важна дабіцца рэзультату. Важна візуальная, інтэрактыўная падрыхтоўка".

У мінулым годзе адбылася выстаўка Made in Belarus ва Украіне. У бягучым годзе яна прайшла ўжо ў Грузіі з удзелам 73 беларускіх прадпрыемстваў, у хуткім часе адбудзецца ў Казахстане з удзелам амаль 90 прадпрыемстваў.

Старшыня БелГПП упэўнены, што такая работа з'яўляецца эфектыўнай і дае рэзультат. У 2017 годзе на мерапрыемствах, арганізаваных БелГПП, падпісаны кантракты на суму каля $110 млн. У 2018 годзе сума ўзрасла ў разы.

Менавіта ў 2018 годзе БелГПП згодна з указам Прэзідэнта атрымала статус каардынатара выставачна-кірмашовай дзейнасці за мяжой. "Выставачная дзейнасць набыла для нас зусім новае значэнне. Гэта не толькі арганізацыйная работа. Гэта лагістычная падтрымка, арганізацыя пераводу, прававое кансультаванне, падбор бізнес-партнёраў і гэтак далей", - адзначыў Уладзімір Улаховіч.

Ён перакананы, што Беларусь мае значны патэнцыял якаснай, інавацыйнай прадукцыі, але не заўсёды ўмела аб гэтым расказвае. "Напрыклад, на пастаяннай выстаўцы Нацыянальнай акадэміі навук можна ўбачыць і ствалавыя клеткі, і новыя тэхналогіі ў раслінаводстве і жывёлагадоўлі. Нашы беспілотнікі - і па далёкасці, і па грузападымальнасці пераўзыходзяць ізраільскія ўзоры, але аб гэтым мала хто ведае. У нас ёсць што паказаць, але трэба навучыцца рабіць гэта так, каб было цікава і звычайным людзям, і спецыялістам", - лічыць ён.

Для прэзентацыі магчымасцей Беларусі ў навукаёмістых сферах БелГПП сумесна з НАН распрацавалі фармат экспазіцыі "Інтэлектуальная Беларусь". Упершыню ён будзе прадстаўлены на выстаўцы Made in Belarus у казахстанскім горадзе Алматы. У экспазіцыю ўключаны, напрыклад, проціпухлінныя лекавыя сродкі, створаныя па поўным тэхналагічным ланцужку Інстытутам біяарганічнай хіміі НАН Беларусі. "НВА Цэнтр" прадставіць цэнтрабежнае абсталяванне для драбнення і класіфікацыі карысных выкапняў, якое дае магчымасць весці працэс перапрацоўкі з высокімі эканамічнымі паказчыкамі. Навукова-практычны цэнтр НАН па матэрыялазнаўстве прадэманструе новыя матэрыялы і вырабы шырокага спектра прымянення - у космасе і авіябудаванні, будаўніцтве, медыцыне, абароне і бяспецы.

версія для друку

зрабіць стартавай

дабавіць у выбранае