Бізнес-навіны

Беларуска-егіпецкая рабочая група ў Каіры разгледзіць інтэнсіфікацыю супрацоўніцтва ў прамсферы

Фота прэс-службы Мінпрама

17 ліпеня, Мінск /Кар. БЕЛТА/. У Каіры на пасяджэнні беларуска-егіпецкай рабочай групы па супрацоўніцтве ў галіне прамысловасці разглядаюцца пытанні інтэнсіфікацыі супрацоўніцтва ў прамысловай сферы, паведамілі карэспандэнту БЕЛТА ў прэс-службе Мінпрама.

З беларускага боку ў пасяджэнні прымае ўдзел намеснік міністра прамысловасці Дзмітрый Харытончык, з егіпецкага - паўнамоцны міністр, кіраўнік Дэпартамента Усходняй Еўропы камерцыйнай службы Егіпта Міністэрства гандлю і прамысловасці Махамед Эльсаед.

"Такое мерапрыемства - значная для Беларусі падзея, у ходзе якой плануецца абмеркаваць шэраг пытанняў і намеціць шляхі далейшага ўзаемавыгаднага супрацоўніцтва ў прамысловай сферы", - сказаў Дзмітрый Харытончык. Намеснік міністра падкрэсліў, што Егіпет як буйная арабская краіна застаецца важнейшым знешнегандлёвым партнёрам нашай краіны ў Афрыцы, і Беларусь заўсёды выказвала зацікаўленасць у развіцці вытворчай кааперацыі з Егіптам.

Цяпер рэалізуецца шэраг сумесных праектаў у галіне прамысловай кааперацыі. Пры гэтым маюцца магчымасці і перспектывы пашырэння ўзаемадзеяння ў гэтай сферы. "Патэнцыял у двухбаковага супрацоўніцтва паміж нашымі краінамі вялікі, а наяўнасць зацікаўленасці і надзейнага партнёрства дасць магчымасць раскрыць яго поўнасцю", - выказаў упэўненасць Дзмітрый Харытончык.

Трэцяе пасяджэнне беларуска-егіпецкай рабочай групы па супрацоўніцтве ў галіне прамысловасці праходзіць у Каіры 17-18 ліпеня. Праграмай візіту Дзмітрыя Харытончыка ў рамках рабочай групы запланаваны сустрэчы з кіраўніцтвам Міністэрства гандлю і прамысловасці, адміністрацыі эканамічнай зоны Суэцкага канала, Асацыяцыі егіпецкіх экспарцёраў, Арабскай арганізацыі і індустрыялізацыі і інш. Па выніках работы рабочай групы прадугледжана падпісанне двухбаковых дакументаў і пратакола пасяджэння.

версія для друку

зрабіць стартавай

дабавіць у выбранае