Бізнес-навіны

9 снежня, Мінск /Юлія Огнева - БЕЛТА/. Беларускі тыдзень прадпрымальніцтва пройдзе з 28 лютага па 6 сакавіка 2016 года. Аб гэтым сёння на анлайн-канферэнцыі на сайце БЕЛТА паведаміў старшыня прэзідыума Рэспубліканскай канфедэрацыі прадпрымальніцтва, старшыня Мінскага сталічнага саюза прадпрымальнікаў і работадаўцаў Уладзімір Карагін.

"Пара арганізаваць Беларускі тыдзень прадпрымальніцтва. У 2016 годзе плануем правесці яго з 28 лютага па 6 сакавіка", - адзначыў Уладзімір Карагін.

Паводле яго слоў, бізнесу неабходна атрымаць ад улад пэўны калідор для рэалізацыі патэнцыялу, які ёсць у прадпрымальнікаў. "У бягучым годзе пачалі сваю дзейнасць дзесяць галіновых асацыяцый, неабходна стварыць яшчэ каля 300, таму што канкурэнтаздольнасць бізнесу ўзрастае ў асацыяцыях. Выхад на міжнародную арэну, прыняцце норм і стандартаў - гэта ўсё вельмі важна", - лічыць Уладзімір Карагін. Ён канстатаваў, што ў ЕАЭС неабходна распрацаваць каля 80 тыс. тэхнічных норм і правіл. "У Казахстана ў Маскве 50 прадстаўнікоў, якія штодзень прымаюць удзел у распрацоўцы неабходных дакументаў, беларускія прадпрымальнікі прадстаўлены толькі эпізадычна", - заявіў Уладзімір Карагін.

Пры гэтым ён падкрэсліў, што вектар развіцця прадпрымальніцтва ў Беларусі ў цэлым выбраны правільна. "Беларускі бізнес мае патрэбу ў падтрымцы праектаў на ўзроўні Br15 трлн, яму неабходна мабільнасць, каб прадпрымальнікі маглі знаходзіць новыя рынкі збыту, забяспечвалі інавацыйнасць сваёй прадукцыі", - сказаў Уладзімір Карагін.

Паводле яго слоў, да новай Нацыянальнай платформы будзе прыкладзена некалькі дарожных карт, у тым ліку па развіцці вытворчага прадпрымальніцтва, укараненні інавацый, абароне інтэлектуальнай уласнасці і знешнеэканамічнай мабільнасці беларускага бізнесу.