Бізнес-навіны

30 жніўня, Мінск /Кар. БЕЛТА/. Беларусь зацікаўлена ў вывучэнні германскага вопыту ў лічбавай эканоміцы. Гэта пытанне абмяркоўвалася на сустрэчы пасла Беларусі ў Германіі Дзяніса Сідарэнкі з намеснікам выканаўчага дырэктара Германскага саюза прамыслова-гандлёвых палат доктарам Фолькерам Траерам, паведамілі БЕЛТА ў пасольстве.

"Асобная ўвага ў час сустрэчы была ўдзелена арганізацыі сумесных мерапрыемстваў па папулярызацыі інвестыцыйных магчымасцей Беларусі сярод нямецкага бізнесу, у тым ліку флагманскага праекта "Вялікі камень". Пасол таксама адзначыў асаблівы інтарэс беларускага боку да вывучэння германскага вопыту па тэматыцы лічбавай трансфармацыі эканомікі і праграмы "Прамысловасць 4.0", - расказалі ў дыппрадстаўніцтве.

Дзяніс Сідарэнка і Фолькер Траер абмеркавалі стан і перспектывы беларуска-германскага эканамічнага і інвестыцыйнага супрацоўніцтва. Бакі далі станоўчую ацэнку рабоце прадстаўніцтва нямецкай эканомікі ў Мінску, якое з'яўляецца структурным падраздзяленнем Германскага саюза прамыслова-гандлёвых палат.