Бізнес-навіны

Беларусь заклікала краіны СНД паскорыць уступленне ў сілу пагаднення аб свабодным гандлі паслугамі

Фота з архiва

22 верасня, Масква /Эдуард Півавар - БЕЛТА/. Беларусь на праведзеным 22 верасня ў рэжыме відэаканферэнцсувязі пасяджэнні Эканамічнага савета СНД заклікала краіны Садружнасці паскорыць уступленне ў сілу пагаднення аб свабодным гандлі паслугамі. Беларускую дэлегацыю на мерапрыемстве ўзначаліў пасол Беларусі ў Расіі, Паўнамоцны прадстаўнік Рэспублікі Беларусь пры Эканамічным савеце СНД Дзмітрый Крутой, паведамілі БЕЛТА ў прэс-службе беларускай дыпмісіі.

Удзельнікі пасяджэння абмяняліся меркаваннямі аб актуальных пытаннях эканамічнага супрацоўніцтва краін СНД. "Кіраўнік беларускай дэлегацыі заклікаў партнёраў да паскоранага правядзення ўнутрыдзяржаўных працэдур, неабходных для ўступлення ў сілу пагаднення аб свабодным гандлі паслугамі, заснаванні, дзейнасці і ажыццяўленні інвестыцый", - сказалі ў прэс-службе.

Дзмітрый Крутой таксама выказаў удзячнасць Выканаўчаму камітэту СНД, нацыянальным дэлегацыям і ў іх асобе спартыўным камандам, балельшчыкам, за садзейнічанне ў арганізацыі і ўдзеле ў другіх Гульнях краін СНД, якія прайшлі ў жніўні ў Беларусі.

Па ініцыятыве Беларусі Эканамсаветам СНД прынята комплекснае рашэнне аб дзейнасці органаў галіновага супрацоўніцтва ў эканамічнай сферы, якое акрэслівае план сумесных дзеянняў на бліжэйшую перспектыву для актывізацыі і павышэння эфектыўнасці гэтай дзейнасці. Міжурадаваму савету па супрацоўніцтве ў галіне ветэрынарыі даручана ўзмацніць каардынацыю сумесных дзеянняў ветэрынарных службаў СНД з мэтай садзейнічання забеспячэнню харчовай бяспекі. Зацверджаны таксама план мерапрыемстваў па рэалізацыі стратэгіі "Здароўе насельніцтва краін Садружнасці на 2024-2025 гады". Міждзяржаўнаму савету па супрацоўніцтве ў навукова-тэхнічнай і інавацыйнай сферах сумесна з Выканаўчым камітэтам СНД даручана правесці інвентарызацыю нарматыўна-прававой базы ў навукова-тэхнічнай і інавацыйнай сферах.

"Адобраны чарговы пакет праектаў дакументаў для іх унясення на разгляд Савета кіраўнікоў урадаў СНД. Ён уключае, у прыватнасці, праект комплексу мерапрыемстваў па рэалізацыі пагаднення аб супрацоўніцтве ў горна-металургічнай галіне ад 28 кастрычніка 2016 года і праект рашэння па гэтым пытанні; праект палажэння аб тэхналагічных платформах у рамках міждзяржаўнай праграмы інавацыйнага супрацоўніцтва на перыяд да 2030 года і праект рашэння па гэтым пытанні; праект рашэння аб выдзяленні асігнаванняў на стварэнне і развіццё аб'яднанай сістэмы проціпаветранай абароны краін Садружнасці ў 2024 годзе", - адзначылі ў прэс-службе.

Прынята рашэнне аб правядзенні юбілейнага, сотага пасяджэння Эканамічнага савета Садружнасці, 8 снежня ў Маскве.

версія для друку

зрабіць стартавай

дабавіць у выбранае