Бізнес-навіны

24 кастрычніка, Мінск /Кар. БЕЛТА/. Беларусь у 5 разоў нарасціла пастаўкі прадуктаў харчавання ў Кітай за восем месяцаў 2018 года. Аб гэтым Надзвычайны і Паўнамоцны Пасол Беларусі ў Кітаі Кірыл Руды расказаў у інтэрв'ю ТАСС, паведамляе БЕЛТА.

"Кітай адкрывае свой рынак, у нас пастаўкі прадуктаў харчавання выраслі за восем месяцаў гэтага года ў пяць разоў. Малака - у дзевяць разоў. У Еўропе, і сярод краін СНД мы адзіныя, хто прайшоў увесь шлях сертыфікацыі ў Кітаі па ялавічыне, птушцы. Па малаку ў нас каля 50 кампаній. Мы выканалі ўсе каранцінныя патрабаванні - там даволі доўгая працэдура, але гэта доказ добрай якасці нашай прадукцыі. Яна паступае ўжо на кітайскі рынак, і просты кітаец можа пакаштаваць нашу ялавічыну", - адзначыў Кірыл Руды.

Ён звярнуў увагу, што структура беларускага экспарту ў Кітай стала мяняцца: калі ў 2015 годзе каля 8 працэнтаў экспарту забяспечвалі калійныя ўгнаенні, то цяпер іх доля скарацілася да 57 працэнтаў. "Усё астатняе - прадукты харчавання. Павялічваецца доля дрэваапрацоўкі. У нас у Беларусі ёсць заводы, якія выступаюць у якасці пастаўшчыкоў для IKEA ў Кітаі", - канстатаваў пасол.

"У нас краіна невялікая, і мы выбудоўваем з Кітаем свае адносіны, асаблівыя, і ідзём па "магістралі адкрытасці". Можа, неяк супраць ветру, але самі і ў сваім напрамку. Мы адкрываемся - доказам таму служаць бязвіз, гандаль і індустрыяльны парк. Гэта датычыцца і гуманітарнай сферы, усіх напрамкаў", - дадаў дыпламат.