Бізнес-навіны

Беларусь разлічвае ў гэтым годзе экспартаваць 8 млн тон калійных угнаенняў

Мікалай Снапкоў

18 ліпеня, Мінск /Кар. БЕЛТА/. Беларусь разлічвае ў гэтым годзе экспартаваць 8 млн тон калійных угнаенняў. Аб гэтым па выніках нарады ў Прэзідэнта Беларусі заявіў журналістам першы віцэ-прэм'ер Мікалай Снапкоў, перадае карэспандэнт БЕЛТА.

Адказваючы на пытанне, наколькі пасля ўвядзення санкцый падаражэла лагістыка, Мікалай Снапкоў сказаў: "Ад двух да пяці разоў - тое, што датычыцца перавалкі. Адпаведна тое, што датычыцца павялічанага чыгуначнага пуці, - гэта таксама прыкладна ў 2-2,5 раза".

"Выконваючы пастаўленыя задачы, мы выйдзем на 8 млн т продажу угнаенняў у бягучым годзе. Пры гэтым "Беларуськалій" працуе з прыбыткам. Ён забяспечвае сваю інвестыцыйную праграму за паўгода, уклаўшы ўжо Br600 млн у інвестыцыі, гэта значыць інвестыцыі ў яго ў адпаведнасці з планам", - падкрэсліў першы віцэ-прэм'ер.

Ён адзначыў, што беларуская кампанія сёння другая ў свеце па аб'ёмах вытворчасці калійных угнаенняў. На першай і трэцяй пазіцыях - канадскія кампаніі. "Гэта сведчыць аб тым, што, у прынцыпе, сістэма продажаў выбудавана эфектыўна, нягледзячы на затраты, якія ўзраслі ў разы", - сказаў Мікалай Снапкоў.

Паводле яго слоў, з-за санкцыйнага націску Беларусь страціла 5,5 млн т з 9-10 млн т (у сярэднім за апошнія гады) ад агульнага аб'ёму паставак айчынных калійных угнаенняў на знешнія рынкі. Адпаведна засталося каля 4,5 млн т на рынках дружалюбных краін. "Мы ў гэтым годзе будзем везці 8 млн т, гэта значыць фактычна ў два разы больш калію на дружалюбныя рынкі, замяшчаючы страчаныя рынкі недружалюбных краін. Адсюль выснова: Канада для нас канкурэнт, але, як вы бачыце зыходзячы з лічбаў, мы выдатна спраўляемся з гэтай канкурэнцыяй", - падкрэсліў першы віцэ-прэм'ер.

версія для друку

зрабіць стартавай

дабавіць у выбранае