Бізнес-навіны

"Беларускі бок гатовы да стварэння зборачных вытворчасцей у Турэцкай рэспубліцы на аснове шырокай кааперацыі з турэцкімі кампаніямі, да паставак дарожна-будаўнічай тэхнікі "Амкадор", кар'ерных самазвалаў БелАЗ, грузавых аўтамабіляў і аўтобусаў МАЗ, трактароў МТЗ, камбайнаў "Гомсельмаша", - адзначыў Андрэй Кабякоў. Ён падкрэсліў, што гэта тэхніка мае высокую якасць, простая ў эксплуатацыі і канкурэнтаздольная.

Таксама Андрэй Кабякоў канстатаваў, што Беларусь бачыць перспектывы супрацоўніцтва ў галіне лёгкай прамысловасці, вытворчасці будаўнічых матэрыялаў, аграпрамысловым комплексе, транспартна-лагістычнай і камунікацыйнай сферах.

"Традыцыйная перавага Беларусі для інвестараў - гэта зручнае геаграфічнае становішча, высокая кваліфікацыя спецыялістаў, высокі тэхнічны ўзровень прадпрыемстваў, стабільная сацыяльна-эканамічная сітуацыя і паслядоўныя дзеянні фінансавых улад", - сказаў кіраўнік беларускага ўрада. Паводле яго слоў, яшчэ адной істотнай перавагай з'яўляецца членства Беларусі ў Еўразійскім эканамічным саюзе. "Гэта 180-мільённы рынак са свабодным перамяшчэннем тавараў, паслуг, капіталу і рабочай сілы, адзіным тарыфным рэгуляваннем, роўнымі ўмовамі для бізнесу", - адзначыў Андрэй Кабякоў.