Бізнес-навіны

Беларусь гатова ўдзельнічаць у стварэнні аграрных комплексаў ва Узбекістане - Кабякоў

12 чэрвеня, Мінск /Кар. БЕЛТА/. Беларусь гатова ўдзельнічаць у стварэнні аграрных комплексаў ва Узбекістане. Аб гэтым паведаміў сёння прэм'ер-міністр Беларусі Андрэй Кабякоў на сустрэчы са старшынёй Сената Олій Мажліса Узбекістана Нігмацілой Юлдашавым, перадае карэспандэнт БЕЛТА.

"Мы гатовы падзяліцца вопытам у сферы аграпрамысловага комплексу і прыняць удзел у стварэнні ва Узбекістане аграрных комплексаў мяса-малочнага напрамку і па перапрацоўцы жывёлагадоўчай прадукцыі за кошт прадастаўлення абсталявання, тэхналогій, а таксама паставак племянной прадукцыі і буйной рагатай жывёлы. Гатовы разгледзець магчымасці ў тым ліку сумеснай вытворчасці камплектуючых, абсталявання, якое будзе запатрабавана", - сказаў Андрэй Кабякоў.

Ён падкрэсліў, што ў дзвюх краін ёсць добрыя магчымасці для кааперацыі ў розных сферах. Разглядаецца магчымасць зборкі ва Узбекістане трактарнай, дарожна-будаўнічай тэхнікі, аўтобусаў на газаматорным паліве. "У нас ёсць магчымасць падумаць над стварэннем сумеснага прадпрыемства па выпуску лекавых сродкаў. Ёсць адпаведныя папярэднія напрацоўкі. Акрамя таго, у вас ёсць зацікаўленасць і мы гатовы арганізаваць, наладзіць сумесную ліцэнзійную вытворчасць кандытарскіх вырабаў ва Узбекістане", - дадаў Андрэй Кабякоў.

Прэм'ер-міністр адзначыў дадатную дынаміку развіцця двухбаковага гандлю. "Але аб'ём $130 млн для ўзаемнага гандлю Беларусі і Узбекістана - гэта вельмі нязначныя лічбы. Патэнцыял нашых эканомік значна перасягае іх, мы павінны ў бліжэйшы час нарасціць наш узаемны гандаль, - сказаў Андрэй Кабякоў. - Мы можам прапанаваць прадукцыю, якая традыцыйна карыстаецца попытам не толькі ў Беларусі, але і за яе межамі. Гэта малочныя прадукты, прадукты з мяса ялавічыны, птушкі. Гатовы разгледзець прапанову ўзбекскага боку па прамых пастаўках у Беларусь баваўнянага валакна, свежых і перапрацаваных фруктаў і агародніны, арэхаў".

Нігмаціла Юлдашаў падзякаваў беларускаму боку за гасціннасць і адзначыў: "Ва Узбекістане з задавальненнем адзначаюць дасягненні Беларусі ў сацыяльна-эканамічным развіцці. Беларусь - адзін з важных і перспектыўных партнёраў Узбекістана. У аснове паспяховага развіцця двухбаковых сувязей ляжаць даверныя адносіны паміж кіраўнікамі дзяржаў".

версія для друку

зрабіць стартавай

дабавіць у выбранае