Бізнес-навіны

6 верасня, Алматы /Святлана Саўко - БЕЛТА/. Беларусь атрымае шосты транш ЕФСР на працягу месяца. Аб гэтым сёння журналістам паведаміў намеснік старшыні праўлення ЕАБР Андрэй Крайні, перадае карэспандэнт БЕЛТА.

"Гэта пытанне цалкам тэхнічнае. Цяпер ідзе афармленне дакументаў, думаю, што на працягу месяца ўжо дакладна грошы будуць выдадзены", - сказаў Андрэй Крайні, гаворачы аб тэрмінах атрымання Беларуссю шостага траншу крэдыту ЕФСР у памеры $200 млн.

Што датычыцца сёмага траншу, то ўмовы па ім будуць удакладняцца. Ёсць пералік працэдур, якія трэба выканаць, растлумачыў ён.

Андрэй Крайні падкрэсліў, што і ЕФСР, і ЕАБР настроены на прадаўжэнне супрацоўніцтва з беларускім бокам. "Беларусь вельмі актыўна крэдытуецца ў банку, займае трэцяе месца па велічыні крэдытаў пасля Казахстана і Расіі. Нас гэта супрацоўніцтва цалкам задавольвае. Праекты добрыя. І потым Беларусь часта дае суверэнныя гарантыі на крэдыты," - адзначыў ён.

Так, на разглядзе знаходзіцца праект на $100 млн па фінансаванні вытворчасці камплектуючых на МТЗ.

Як паведамлялася, Беларусь у першай палавіне 2015 года падала заяўку на новы крэдыт у памеры $3 млрд у Антыкрызісны фонд ЕўрАзЭС (цяпер мае назву Еўразійскі фонд стабілізацыі і развіцця - ЕФСР). Пазней першапачаткова агучаная сума крэдыту для Беларусі ў памеры $3 млрд зменшылася да $2 млрд. Сродкі прадастаўляюцца сямю траншамі.