Бізнес-навіны

Беларусь і Ульянаўская вобласць маюць намер стварыць у гэтым рэгіёне новыя зборачныя вытворчасці беларускай тэхнікі

Фота прэс-службы ўрада Ульянаўскай вобласці

29 лютага, Масква /Эдуард Півавар - БЕЛТА/. Беларусь і Ульянаўская вобласць маюць намер стварыць у гэтым рэгіёне новыя зборачныя вытворчасці беларускай тэхнікі. Аб гэтым заявіў журналістам пасол Беларусі ў Расіі Дзмітрый Крутой па выніках перагавораў з губернатарам Ульянаўскай вобласці Аляксеем Рускіх, паведамляе карэспандэнт БЕЛТА.

Дзмітрый Крутой нагадаў, што ва Ульянаўскай вобласці працуе ўжо зборачная вытворчасць прычэпаў і паўпрычэпаў на базе шасі Мінскага аўтазавода і гэта прадпрыемства плануецца пашырыць. "Улічваючы, што праект паспяхова пачаў рэалізоўвацца, кіраўніком рэгіёна прынята рашэнне выдзеліць у індустрыяльным парку "Заволжа" ўчастак 5 тыс. кв.м для пашырэння гэтай вытворчасці. Цяпер мы з кіраўніцтвам Мінскага аўтамабільнага завода думаем, якія яшчэ віды тэхнікі мы можам там сумесна збіраць", - сказаў ён.

Дыпламат канстатаваў, што за апошні год узаемадзеянне Беларусі і Ульянаўскай вобласці значна пашырылася, бакі прыбавілі ў гандлёва-эканамічным супрацоўніцтве. "З беларускага боку гэта плюс 15 працэнтаў, я лічу, гэта вельмі добрая лічба. У нас з'явілася некалькі новых сур'ёзных таварных пазіцый: драўняныя пліты, прадукцыя дрэваапрацоўкі, якая ва ўмовах санкцый пачала замяшчаць адпаведныя рыначныя нішы. Бытавая тэхніка ўсіх відаў - у тым ліку наш холдынг "Гарызонт" тут актыўна ўдзельнічае ў пастаўках. Гэта і шкловалакно - прадукцыя, якая таксама патрэбна прадпрыемствам Ульянаўскай вобласці ў рамках праграмы імпартазамяшчэння. І ў адваротны бок тое ж самае, гэта значыць у нас адбыўся люстраны рост узаемных паставак", - адзначыў Дзмітрый Крутой.

"Гэта сведчыць аб тым, што сапраўды ідзе вельмі пазітыўны працэс супрацоўніцтва і наладжвання кааперацыйных ланцужкоў. За апошнія два гады мы правялі вялікую работу. Каля 30 кааперацыйных ланцужкоў мы ўжо выявілі, і па іх ідзе вельмі сур'ёзнае ўзаемадзеянне", - дадаў губернатар Аляксей Рускіх.

Беларуская дэлегацыя будзе знаходзіцца ва Ульянаўскай вобласці да 2 сакавіка. У яе склад увайшлі першы намеснік старшыні Мінскага гарадскога выканаўчага камітэта Надзея Лазарэвіч, прадстаўнікі буйных прамысловых беларускіх прадпрыемстваў і шэрага медустаноў.

Праграмай візіту прадугледжаны афіцыйныя сустрэчы, наведванне такіх прамысловых прадпрыемстваў рэгіёна, як філіял ПАТ "Іл"-Авіястар", філіял АТ "Аэракампазіт", ТАА "УАЗ", ТАА "СІМАЗ", ТАА "Аўтадом", АТ "Ульянаўскае канструктарскае бюро прыборабудавання", ТАА "Палессе ДГ", ГК "Халтэк", DM Technologies, АТ "Прамтэх-Ульянаўск", правядзенне сумеснага круглага стала па развіцці супрацоўніцтва ў сферы прамысловасці паміж Беларуссю і Ульянаўскай вобласцю. Запланаваны таксама наведванні Федэральнага навукова-клінічнага цэнтра медыцынскай радыялогіі і анкалогіі ў Дзімітраўградзе, Ульянаўскага інстытута грамадзянскай авіяцыі, цэнтра выяўлення і падтрымкі адораных дзяцей "Пунсовыя ветразі", Ульянаўскага авіяцыйнага каледжа, Палаца мастацкай гімнастыкі "Таццяна-Арэна", а таксама сустрэча з Саветам рэктараў ВНУ Ульянаўскай вобласці.

версія для друку

зрабіць стартавай

дабавіць у выбранае