Бізнес-навіны

Беларусь і РФ падпісалі дагавор аб агульных прынцыпах падаткаабкладання па ўскосных падатках

3 кастрычніка, Масква /Эдуард Півавар - БЕЛТА/. Дагавор паміж Беларуссю і Расіяй аб агульных прынцыпах падаткаабкладання па ўскосных падатках - падатку на дабаўленую вартасць (ПДВ) і акцызах - заключаны сёння ў Маскве па выніках перагавораў прэм'ер-міністраў дзвюх краін Рамана Галоўчанкі і Міхаіла Мішусціна, перадае карэспандэнт БЕЛТА.

Дакумент падпісалі міністры фінансаў Беларусі і Расіі Юрый Селіверстаў і Антон Сілуанаў.

Галоўная мэта дагавора - гарманізацыя падатковага заканадаўства Беларусі і Расійскай Федэрацыі, а таксама паглыбленне супрацоўніцтва ў падатковай сферы. Згодна з дакументам да 1 студзеня 2023 года бакі павінны прывесці сваё падатковае заканадаўства, якое датычыцца ПДВ і акцызаў, у адпаведнасць з палажэннямі дагавора. Так, напрыклад, стаўкі акцызаў на мінімальны пералік тавараў і паслуг, вызначаны дагаворам, павінны быць не ніжэй памеру мінімальных ставак, названых у дадатку да дакумента.

Акрамя таго, дагаворам устанаўліваюцца адзіныя для дзвюх краін пералікі аперацый (абаротаў), якія вызваляюцца ад выплаты ПДВ або абкладаюцца ПДВ па паніжанай падатковай стаўцы.

Дакумент таксама прадугледжвае стварэнне інтэграванай сістэмы адміністравання ўскосных падаткаў. У сістэму будзе заносіцца інфармацыя аб аперацыях падаткаплацельшчыкаў ПДВ дзвюх краін, якія стаяць на ўліку ў падатковых органах на 1 студзеня 2023 года. Яна патрэбна для скразнога аналізу дадзеных па падатку на дабаўленую вартасць.

Акрамя таго, у рамках дагавора плануецца стварэнне наднацыянальнага падатковага камітэта, які будзе сачыць за выкананнем бакамі ўстаноўленых дамоўленасцей.

Дагавор падпісаны ў рамках рэалізацыі 28 саюзных праграм, зацверджаных дэкрэтам Вышэйшага дзяржаўнага савета Саюзнай дзяржавы ад 4 лістапада 2021 года.-0-

версія для друку

зрабіць стартавай

дабавіць у выбранае