Бізнес-навіны

Беларусь і Куба разлічваюць нарасціць аб'ёмы ўзаемных паставак

Фота з архiва

12 чэрвеня, Мінск /Кар. БЕЛТА/. Беларусь і Куба разлічваюць нарасціць аб'ёмы ўзаемных паставак. Аб гэтым заявіў міністр замежных спраў Яўген Шэстакоў на падагульняючым пасяджэнні беларуска-кубінскай сумеснай камісіі па гандлёва-эканамічным супрацоўніцтве, перадае карэспандэнт БЕЛТА.

Камісія працавала ў Мінску на працягу некалькіх дзён. Як расказаў Яўген Шэстакоў, бакі абмеркавалі асноўныя пытанні развіцця адносін, актуалізавалі планы і вызначылі найбольш перспектыўныя праекты, якія можна было б ажыццявіць максімальна хутка.

Па выніках пасяджэння падрыхтаваны пратакол да міжурадавага пагаднення аб узаемных пастаўках. Гэтым дакументам бакі ўстанаўліваюць новую планку для аб'ёмаў тавараабмену - да $15 млн для кожнага з бакоў на працягу 5 гадоў. Лічба здаецца невялікай, але на самай справе гэта амбіцыйная задача, улічваючы, што за 10 гадоў работы ў рамках гэтага механізма абмен таварамі ажыццяўляўся на значна меншую суму.

"Мы вельмі разлічваем, што механізм дасць магчымасць павялічыць гандлёвы абарот паміж краінамі ва ўмовах нарастаючага санкцыйнага націску", - сказаў Яўген Шэстакоў.

Паводле яго слоў, важныя дамоўленасці дасягнуты ў банкаўскай сферы, прамысловасці, фармацэўтыцы, у сферы навукі і тэхналогій. На пасяджэнні, у прыватнасці, абмяркоўваліся пастаўкі на Кубу беларускага сухога малака, арганізацыя сумесных трактарнай, малочнай і фармвытворчасці.

Беларусь і Куба разлічваюць, што ўсе дамоўленасці будуць замацаваны на паперы ў час плануемага візіту прэм'ер-міністра Рамана Галоўчанкі ў Гавану.

версія для друку

зрабіць стартавай

дабавіць у выбранае