Бізнес-навіны
Беларусь і Кабардзіна-Балкарыя актывізуюць эканамічнае супрацоўніцтва
29 кастрычніка, Мінск /Кар. БЕЛТА/. Беларуская дэлегацыя на чале з міністрам інфармацыі Уладзімірам Пярцовым наведала Кабардзіна-Балкарыю, паведамляе БЕЛТА са спасылкай на сайт кіраўніка гэтага расійскага рэгіёна.
Візіт прайшоў у рамках рэалізацыі пагаднення аб супрацоўніцтве, падпісанага паміж Кабардзіна-Балкарскай Рэспублікай і Беларуссю ў верасні мінулага года на VII Форуме рэгіёнаў Беларусі і Расіі. Наша дэлегацыя наведала шэраг прадпрыемстваў рэгіёна, дзе адбыўся абмен думкамі па пытаннях развіцця напрацаваных сацыяльна-эканамічных сувязей, абазначаны асноўныя напрамкі супрацоўніцтва. Таксама Уладзімір Пярцоў правёў сустрэчу з кіраўніком КБР Казбекам Кокавым, потым прайшло пасяджэнне сумеснай рабочай групы. Па выніках перагавораў падпісаны план мерапрыемстваў па рэалізацыі пагаднення паміж Кабардзіна-Балкарскай Рэспублікай і ўрадам Беларусі.
Адкрываючы пасяджэнне, Казбек Кокаў адзначыў, што паміж народамі Кабардзіна-Балкарыі і Беларусі на працягу многіх гадоў захоўваюцца і развіваюцца ўстойлівыя дружалюбныя ўзаемаадносіны. "У рэспубліцы створана і на сённяшні дзень актыўна функцыянуе грамадскі рух беларусаў "За яднанне - "Сябры". Важна, што Беларусь і Кабардзіна-Балкарыю аб'ядноўваюць не толькі даўнія традыцыі дружбы і ўзаемадапамогі, але і шматбаковае эканамічнае партнёрства, якое мы маем намер яшчэ больш актыўна развіваць. Упэўнены, візіт нашых дарагіх гасцей, план мерапрыемстваў нададуць дадатковы імпульс далейшаму пашырэнню супрацоўніцтва, умацаванню дружбы і братэрства паміж нашымі народамі, умацаванню Саюзнай дзяржавы", - падкрэсліў кіраўнік рэспублікі.
Уладзімір Пярцоў у сваю чаргу запрасіў прадстаўнікоў Кабардзіна-Балкарыі наведаць выстаўку "Белагра". "Узаемны абарот гандлю паміж нашымі краінамі ў студзені - жніўні 2021 года скараціўся на 15,8 працэнта. Гэта адбылося з-за істотнага спаду беларускага экспарту, што можна растлумачыць наступствамі пандэміі. У той жа час імпарт тавараў з Кабардзіна-Балкарыі ў Беларусь павялічыўся на 30,1 працэнта. Мне здаецца, што і Беларусь мае дастатковыя рэсурсы для таго, каб забяспечыць патрэбнасці Кабардзіна-Балкарыі", - сказаў міністр.
Акрамя таго, падчас візіту беларускай дэлегацыі ў Кабардзіна-Балкарыю Казбек Кокаў і Уладзімір Пярцоў наведалі Чагемскі раён, дзе ўсклалі кветкі да мемарыяла "Вечны агонь славы", ушанавалі памяць воінаў, якія загінулі ў Вялікай Айчыннай вайне.
"Вельмі важным складнікам адносін паміж Расіяй і Беларуссю з'яўляецца перыяд Другой сусветнай вайны, калі нашы народы разам зламалі хрыбет фашызму. У нас агульная гісторыя і адносіны нашых народаў умацаваны палітыкай прэзідэнта Расійскай Федэрацыі і Прэзідэнта Рэспублікі Беларусь", - падкрэсліў Казбек Кокаў.
Уладзімір Пярцоў дадаў, што "ў нас ёсць чым ганарыцца, мы ўсе дзеці вялікай вайны і перамогі і будзем процістаяць спробам сказіць гістарычную праўду. Праязджаючы па вашай цудоўнай рэспубліцы, мы бачылі малыя і вялікія помнікі, прысвечаныя Вялікай Айчыннай вайне, і ўдзячны, што вы захоўваеце памяць аб гэтым".
Таксама беларуская дэлегацыя пабывала ў новай школе Чагема, якая была пабудавана па нацыянальным праекце "Адукацыя" і прыняла першых вучняў у верасні гэтага года. Госці агледзелі будынак, адзначылі якасць будаўнічых работ і зручнае інфраструктурнае ўладкаванне тэрыторыі ўстановы, паразмаўлялі з педагогамі. Кіраўнік рэспублікі падзяліўся вопытам арганізацыі комплекснага будаўніцтва сацыяльна значных устаноў, якое ўлічвае не толькі ўнутраныя работы, але і добраўпарадкаванне тэрыторыі, дарожнае будаўніцтва, асвятленне.
версія для друку
зрабіць стартавай
дабавіць у выбранае