Бізнес-навіны

2 снежня, Мінск /Кар. БЕЛТА/. Беларусь і Эквадор плануюць рэалізаваць амаль 20 навукова-тэхнічных праектаў у сферы інфармацыйных тэхналогій, прыкладной хіміі і фізікі, сельскай гаспадаркі, космасу і аднаўляльнай энергіі. Аб гэтым БЕЛТА паведаміў памочнік старшыні Дзяржаўнага камітэта па навуцы і тэхналогіях Беларусі Юрый Лукашэвіч.

"Гэта пытанне абмяркоўвалася сёння ў час сустрэчы старшыні ДКНТ Аляксандра Шуміліна і міністра-каардынатара па пытаннях ведаў і чалавечага таленту Рэспублікі Эквадор Андрэса Арауса. Акрамя таго, цяпер абмяркоўваецца магчымасць рэалізацыі сумесных праектаў з Паркам высокіх тэхналогій, а таксама арганізацыі сумеснага прадпрыемства ў Эквадоры па вытворчасці беспілотных авіяцыйных комплексаў і прадукцыі, што выпускаецца НПЦ "БАК і тэхналогіі", - растлумачыў ён.

Юрый Лукашэвіч адзначыў, што Андрэс Араус падкрэсліў зацікаўленасць эквадорскага боку ў развіцці і паглыбленні двухбаковага супрацоўніцтва па ўсіх напрамках навукова-тэхналагічнага развіцця. "Мы ведаем тэхналагічныя магчымасці Беларусі, і нам хочацца, каб нашы прыватныя і дзяржаўныя прадпрыемствы актыўна выкарыстоўвалі іх", - працытаваў памочнік старшыні ДКНТ міністра-каардынатара па пытаннях ведаў і чалавечага таленту Рэспублікі Эквадор. Андрэс Араус таксама адзначыў, што ў бліжэйшыя гады колькасць эквадорскіх студэнтаў, якія вучацца ў беларускіх ВНУ, значна павялічыцца. "Навуковыя, адукацыйныя праекты - гэта аснова для працяглых адносін паміж нашымі краінамі", - падкрэсліў Андрэс Араус у час сустрэчы.