Бізнес-навіны

Беларусь і Аман плануюць развіваць узаемны гандаль праз біржу

Фота БУТБ

27 жніўня, Мінск /Кар. БЕЛТА/. Беларусь і Аман плануюць развіваць узаемны гандаль праз біржу. Аб гэтым ішла размова ў час сустрэчы з прадстаўнікамі Міністэрства гандлю, прамысловасці і садзейнічання інвестыцыям Амана, паведамілі БЕЛТА ў прэс-службе Беларускай універсальнай таварнай біржы.

На сустрэчы ў сталіцы Амана Маскаце абмеркаваны магчымасці прымянення біржавога механізма для актывізацыі ўзаемнага гандлю Амана і Беларусі.

У якасці прыярытэтнага напрамку двухбаковага супрацоўніцтва ў біржавой сферы разглядаецца рэалізацыя прадукцыі аграпрамысловага комплексу. У прыватнасці, плануецца выкарыстоўваць пляцоўку Беларускай універсальнай таварнай біржы для паставак малакапрадуктаў, якія вырабляюцца ў Беларусі, на рынак Амана. З гэтай мэтай на БУТБ ужо акрэдытавана першая аманская кампанія, якая ў бліжэйшы час мае намер прыняць удзел у біржавых таргах.

"Найбольшую цікавасць для аманскага боку ўяўляе сухое малако, якое шырока прымяняецца ў харчовай прамысловасці краіны. Таму пачынаць біржавы гандаль з Аманам мэтазгодна менавіта з гэтай таварнай пазіцыі. Пры гэтым трэба адзначыць, што кампаніі з дзвюх суседніх краін - Аб'яднаных Арабскіх Эміратаў і Саудаўскай Аравіі - ужо набываюць беларускую малочную прадукцыю праз біржавую платформу. Літаральна на мінулым тыдні рэзідэнты гэтых дзяржаў правялі першыя здзелкі па куплі сухога абястлушчанага малака. Агульны аб'ём закупкі склаў амаль 5 тыс. т", - расказалі ў прэс-службе БУТБ.

У далейшым, акрамя прадукцыі малочнай галіны, лінейка беларускіх тавараў, якія пастаўляюцца ў Аман праз БУТБ, можа быць пашырана за кошт такіх пазіцый, як рапсавы алей, цукровабурачныя жамерыны і мелес, цукар, амінакіслоты, кармавыя дабаўкі. Перагаворы з патэнцыяльнымі пакупнікамі гэтых тавараў на біржавых таргах былі праведзены ў час B2B-сустрэч.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае