Бізнес-навіны

БДУ прадставіць больш за 20 распрацовак на віртуальнай выстаўцы навукова-тэхнічных дасягненняў Беларусі

Фота з архiва

18 лістапада, Мінск /Кар. БЕЛТА/. Больш за 20 распрацовак прадставіць БДУ на віртуальнай выстаўцы навукова-тэхнічных і інавацыйных дасягненняў Беларусі, паведамілі БЕЛТА ў прэс-службе ВНУ.

Выстаўка пройдзе 19 лістапада ў час трэцяга пасяджэння камісіі па навукова-тэхнічным супрацоўніцтве беларуска-кітайскага міжурадавага камітэта па супрацоўніцтве. "У экспазіцыю БДУ ўвойдуць харчовыя дабаўкі, фармацэўтычныя прэпараты, тэхналагічнае абсталяванне. У іх ліку арыгінальныя беларускія проціпухлінныя прэпараты "Цысплацэл", "Праспідэлонг", "Тэмадэкс", накіраваныя на процідзеянне злаякасным пухлінам галавы, шыі, рака страўніка, медыцынская ўстаноўка агульнай гіпертэрміі "Пціч-М" для лячэння анкалагічных захворванняў унутраных органаў. Сярод медыцынскіх ветэрынарных сродкаў будзе прадстаўлена інавацыйная серыя біяпрэпаратаў для лячэння і прафілактыкі хвароб сельскагаспадарчых жывёл", - расказалі ў прэс-службе.

Сярод распрацовак беларускай ВНУ - тэхналогія феномнага аналізу дрэвавых раслін. Інавацыйны метад дае магчымасць рэгістраваць фізіялагічныя змяненні раслін, ацэньваць жыццяздольнасць саджанцаў і ажыццяўляць іх якасны і аператыўны адбор. Такі падыход эфектыўны пры селекцыі сартоў з каштоўнымі сельскагаспадарчымі або дэкаратыўнымі прыкметамі. Дзякуючы гэтай тэхналогіі на прадпрыемстве "Шчомысліца" БДУ вырашчана каля 30 тыс. саджанцаў. Навацыя таксама эканамічна больш выгадная, чым існуючыя замежныя прапановы.

З дэталізаванай інфармацыяй аб навуковых дасягненнях універсітэта ў галіне прыборабудавання і аўтаматызацыі, іх канкурэнтных перавагах, тэхнічных характарыстыках можна будзе азнаёміцца з дапамогай віртуальных узораў, тэматычных плакатаў на рускай, англійскай і кітайскай мовах.

У пасяджэнні камісіі па навукова-тэхнічным супрацоўніцтве беларуска-кітайскага міжурадавага камітэта па супрацоўніцтве ад БДУ прымуць удзел прарэктар па вучэбнай рабоце і інтэрнацыяналізацыі адукацыі Канстанцін Казадаеў і вядучы спецыяліст аддзела прагназавання і экспертных рашэнняў упраўлення экспертнай і аналітычнай работы Вячаслаў Лявонаў. Сустрэча пройдзе ў фармаце відэаканферэнцыі.

Арганізатарам навуковага мерапрыемства выступае Дзяржаўны камітэт па навуцы і тэхналогіях.

версія для друку

зрабіць стартавай

дабавіць у выбранае