Бізнес-навіны

Азербайджанская Socar паставіць у сакавіку ў Беларусь каля 250 тыс. т нафты

Фота з архiва

6 сакавіка, Мінск /Кар. БЕЛТА/. Дзяржаўная нафтавая кампанія Азербайджана Socar паставіць у сакавіку ў Беларусь каля 250 тыс. т нафты, паведаміў карэспандэнту БЕЛТА прэс-сакратар канцэрна "Белнафтахім" Аляксандр Цішчанка.

"Аб'ём паставак ад Socar на сакавік павялічыўся, будзе трэці танкер. Агульны аб'ём складзе каля 250 тыс. т нафты. Гэта не апошнія танкеры, якія плануюцца для нашых заводаў", - адзначыў Аляксандр Цішчанка.

Паводле яго слоў, першы танкер з нафтай для Мазырскага НПЗ выйшаў сёння з турэцкага порта Джэйхан. З тэрыторыі Украіны сыравіна будзе дастаўляцца па нафтаправодзе Адэса - Броды. "Гэты нафтаправод гатовы да работы з нашай нафтай", - падкрэсліў прэс-сакратар.

"Мы на сённяшні дзень выйшлі з зоны камфорту, працуем з альтэрнатыўнымі пастаўшчыкамі, дыверсіфікацыя прадаўжаецца. Нафта, якая павінна была пастаўляцца па трубе, цяпер выкінута на рынак трэйдарам. Сёння з трэйдарамі, як паказвае практыка, працаваць можна, гэта даволі гібкая і аператыўная сістэма", - пракаменціраваў Аляксандр Цішчанка.

Што датычыцца паўночнага напрамку паставак - балтыйскіх партоў, то прадстаўнік "Белнафтахіма" растлумачыў, што два сакавіцкія танкеры - не апошнія, пастаўкі па гэтай лагістычнай схеме плануецца прадоўжыць. Наступныя танкеры могуць прыйсці, верагодней за ўсё, у красавіку.

Гаворачы аб раней заяўленым аб'ёме паставак у сакавіку на беларускія НПЗ дзесьці 1 млн т нафты, Аляксандр Цішчанка ўдакладніў, што падагульняючая лічба за месяц можа атрымацца і большай. "Усё залежыць ад хуткасці пастаўкі, напрыклад, умовы надвор'я ў студзені затрымалі танкер з нарвежскай нафтай, ён павінен быў зайсці ў порт крыху раней", - адзначыў ён.

Адказваючы на пытанне аб краінах, дзе здабываецца нафта, якая набываецца ў трэйдараў, Аляксандр Цішчанка звярнуў увагу: "Не важна, чыя нафта, галоўнае - каб характарыстыкі нафты супадалі з тэхнічнымі параметрамі нашых заводаў".

Як паведамлялася, нафтавая кампанія Socar можа паставіць у Беларусь у 2020 годзе да 1 млн т нафты. У наступныя гады аб'ёмы будуць павялічвацца.

4 сакавіка ў Клайпеду прыбыў танкер з расійскай нафтай ад трэйдараў для ААТ "Нафтан". У сакавіку чакаецца яшчэ адзін. Агульны аб'ём - каля 160 тыс. т.

Акрамя гэтага, у сакавіку нафту без прэміі будуць пастаўляць шэсць расійскіх кампаній, сярод якіх "Сафмар" і пяць новых для Беларусі пастаўшчыкоў. У прыватнасці, група кампаній "Сафмар" паставіць 300 тыс. т нафты, "УДС нафта" - 50 тыс. т.

Пастаўкі ад буйных нафтавых кампаній з Расіі спынены 1 студзеня з-за таго, што не былі дасягнуты дамоўленасці па цане. Як тлумачыў першы віцэ-прэм'ер Дзмітрый Крутой, Беларусь лічыць эканамічна немэтазгодным і бессэнсоўным плаціць прэміі расійскім нафтавым кампаніям у ранейшых аб'ёмах.

версія для друку

зрабіць стартавай

дабавіць у выбранае