Бізнес-навіны

АПК, будматэрыялы і пастаўкі беларускай тэхнікі. Крутой правёў перагаворы з губернатарам Курскай вобласці

Фота з архiва

11 студзеня, Масква /Эдуард Півавар - БЕЛТА/. Курская вобласць зацікаўлена ў супрацоўніцтве з Беларуссю ў сферы АПК, а таксама ў пастаўках беларускіх будматэрыялаў і тэхнікі. Аб гэтым паведаміў пасол Беларусі ў Расіі Дзмітрый Крутой, адказваючы на пытанне карэспандэнта БЕЛТА па выніках праведзеных у Маскве перагавораў з губернатарам Курскай вобласці Раманам Старавойтам.

"Курская вобласць у мінулым годзе па сутнасці паставіла гістарычны рэкорд у адносінах з Беларуссю - $400 млн тавараабароту. Ніколі такога не было: рост 93 працэнты. Мы сёння з губернатарам паглядзелі яшчэ раз гэтыя лічбы. Пашырылася наменклатура прадукцыі", - сказаў Дзмітрый Крутой.

Ён канстатаваў, што цяпер увага кіраўніцтва Курскай вобласці адцягнута на пытанні, звязаныя з СВА. "Тым не менш нам удалося правесці некалькі класных мерапрыемстваў па лініі бізнесу. У першую чаргу іх цікавіць АПК, будаўнічыя матэрыялы, дрэваапрацоўка і пастаўка рознай наменклатуры беларускай тэхнікі. Гэта ўсё мы акумулявалі ў праграму на 2023-2025 гады: гэта свежы дакумент, які мы падпісалі з губернатарам, і цяпер яго рэалізуем. Дамовіліся, што дзесьці ў красавіку-маі адбудзецца мой візіт з прадстаўнікамі беларускага бізнесу ў Курскую вобласць. Нягледзячы на ўсе нюансы ваенна-палітычнай абстаноўкі, губернатар гатовы з намі працаваць: поўная адкрытасць", - адзначыў Дзмітрый Крутой.

Паводле яго слоў, курскі губернатар асабліва ацаніў фармат узаемадзеяння менавіта з беларускімі рэгіёнамі. "Сёння ён падпісаў пагадненне з Гомельскай вобласцю. Ёсць цудоўныя камунікацыі з Магілёўскай вобласцю, ну і іншыя нашы рэгіёны будзем падцягваць. Таму Курская вобласць - прыклад паспяховай менавіта рэгіянальнай работы", - дадаў пасол.

Гаворачы аб магчымасцях прамысловай кааперацыі з Курскай вобласцю, Дзмітрый Крутой паведаміў, што гэта тэма цяпер знаходзіцца ў стадыі прапрацоўкі.  "Першае - гэта будаўніцтва малочнатаварных ферм: Курская вобласць плануе ўдзяліць вельмі сур’ёзную ўвагу развіццю сельскай гаспадаркі. Усе варыянты будаўніцтва пад ключ беларускіх аграпрамысловых комплексаў і выкарыстанне нашага абсталявання ім спадабаліся: у першым набліжэнні гэта ў два разы танней за заходнія аналагі. Таму губернатар гатовы некалькі пілотных праектаў нам прапанаваць", - звярнуў увагу пасол.

версія для друку

зрабіць стартавай

дабавіць у выбранае