Бізнес-навіны

Алжыр, Туніс, Кувейт, Мексіка: прадпрыемствы дрэваапрацоўкі асвойваюць новыя рынкі

28 ліпеня, Гомель /Кар. БЕЛТА/. Дрэваапрацоўчыя прадпрыемствы ў бягучым годзе пачалі асвойваць новыя рынкі, паведамілі БЕЛТА ў прэс-службе канцэрна "Беллеспаперапрам".

Беларускія вытворцы галіны заяўляюць аб сабе і пачынаюць займаць нішы на абсалютна новых рынках. Так, у гэтым годзе пачалі асвойваць такія краіны, як Алжыр, Туніс, Кувейт, Мексіка, Перу, Эквадор. "Высокі рост экспарту адзначаецца ў Тайланд, Аб'яднаныя Арабскія Эміраты, Іран, Ірак, Егіпет - у 1,5-2 разы", - адзначылі ў канцэрне.

Як падкрэсліў пры наведванні прадпрыемства "Гомельдрэў" намеснік прэм'ер-міністра Юрый Назараў, нельга таксама забываць аб правераных не адным дзесяцігоддзем, традыцыйных для беларускай дрэваапрацоўкі рынках - Расійскай Федэрацыі і іншых краінах СНД.

Прадпрыемствы галіны актыўна прапрацоўваюць рэзервы ў гэтым напрамку. Зробленыя захады даюць вынік. Так, за пяць месяцаў арганізацыямі канцэрна "Беллеспаперапрам" экспарт у Расію павялічаны амаль у 1,5 раза (або на 47 працэнтаў). Доля расійскага рынку вырасла з 26 працэнтаў у студзені да 34 працэнтаў у маі. Прадукцыя пастаўляецца ў 68 рэгіёнаў Расіі. Дадатная дынаміка экспарту назіраецца ў 47 рэгіёнах. "Рэзервы відавочныя: важна больш цесна працаваць з кожным рэгіёнам. Тое ж датычыцца і іншых краін блізкага і далёкага замежжа", - акцэнтаваў Юрый Назараў.

Віцэ-прэм'ер азнаёміўся з бягучай работай прадпрыемства, рэзервамі для нарошчвання аб'ёмаў вытворчасці мэблі і павелічэння паставак на экспарт і задавальнення ўнутранага попыту. Ён вывучыў асартымент у фірменным магазіне "Гомельдрэва", а таксама асаблівасці вытворчасці ў цэхах.

ААТ "Гомельдрэў" - адно з буйнейшых і старэйшых мэблевых прадпрыемстваў у рэспубліцы, прысутнічае на рынку з 1879 года. Вытворчая праграма прадпрыемства ўключае поўны цыкл вырабу прадукцыі: ад лесанарыхтоўкі, лесапілавання, сушкі, дрэваапрацоўкі да гатовых відаў і ўзораў вырабаў.

версія для друку

зрабіць стартавай

дабавіць у выбранае