Бізнес-навіны

Аграрыі Тамбоўскай вобласці актыўна мяняюць заходнюю тэхніку на беларускую

Фота з архiва

19 красавіка, Тамбоў /Эдуард Півавар - БЕЛТА/. Аграрыі Тамбоўскай вобласці Расіі актыўна мяняюць заходнюю сельскагаспадарчую тэхніку на беларускую. Аб гэтым расказаў карэспандэнту БЕЛТА камерцыйны дырэктар тамбоўскага ТАА "ЭПФ" Вадзім Рызаеў, што з'яўляецца дылерам у рэгіёне беларускіх прадпрыемстваў МТЗ, "Гомсельмаш", "Бабруйскаграмаш" і шэрага іншых.

"Мы за мінулы год значна нарасцілі продажы беларускай тэхнікі - больш як на 84 працэнты, прадалі яе амаль на 1 млрд расійскіх рублёў. Для нас беларускія прадпрыемствы - стратэгічны, надзейны і верны партнёр", - сказаў Вадзім Рызаеў. Усяго ж з 2014 года, калі было ўтворана ТАА, яно рэалізавала ў Тамбоўскай вобласці больш як 400 камбайнаў "Гомсельмаш" і звыш 1 тыс. трактароў МТЗ.

"Тэндэнцыя мінулага года захоўваецца і ў гэтым годзе - большасць заходніх вытворцаў сышлі, няма стабільных ланцужкоў паставак іх запчастак і тамбоўскія сельгасвытворцы актыўна пераходзяць на беларускую тэхніку, - падкрэсліў ён. - Значна палепшыліся яе тэхнічныя характарыстыкі, камфорт для механізатараў - за гэта асобны дзякуй канструктарам і прадпрыемствам".

Камерцыйны дырэктар таксама адзначыў, што ў ТАА створана шырокая сетка сэрвісных цэнтраў па абслугоўванні беларускай тэхнікі. "Мы поўнасцю забяспечаны запчасткамі і сельгасвытворцы аддаюць перавагу беларускай тэхніцы - гэта ўпэўненасць для іх у заўтрашнім дні. Гэта значыць калі тэхніка зламаецца, мы яе хутка адрамантуем, таму што 98 працэнтаў запчастак ёсць у нас у наяўнасці на складзе", - растлумачыў ён.

"Мы пастаянна глядзім новую беларускую тэхніку, пастаянна ў пошуку, вядзём перагаворы", - дадаў Вадзім Рызаеў.

19 красавіка ў час візіту ў Тамбоўскую вобласць пасол Беларусі ў Расіі Дзмітрый Крутой правёў нараду з дылерамі беларускіх прадпрыемстваў на пляцоўцы абласнога Цэнтра каардынацыі падтрымкі бізнесу. Абмяркоўваліся пастаўкі абсталявання і запчастак, канкурэнцыя з кітайскімі вытворцамі, пашырэнне мадэльнага раду, механізма экспартнай падтрымкі. Як падкрэслівалі ўдзельнікі нарады, якія прадстаўляюць Тамбоўскую вобласць, прэтэнзій да якасці ў дылераў і спажыўцоў беларускай тэхнікі няма.

версія для друку

зрабіць стартавай

дабавіць у выбранае