Бізнес-навіны
Аграрны кластар, пастаўкі сельгастэхнікі і электратранспарту: пра што Крутой дамовіўся ў Хабараўскім краі
Фота Пасольства Рэспублікі Беларусь у Расійскай Федэрацыі
11 верасня, Масква /Эдуард Півавар - БЕЛТА/. Пасол Беларусі ў Расіі 8-11 верасня зрабіў рабочы візіт у Хабараўскі край, паведамілі БЕЛТА ў прэс-службе беларускага дыппрадстаўніцтва.
Прымаючы ўдзел у рабоце V Далёкаўсходняга форуму прадпрымальнікаў, Дзмітрый Крутой выказаў упэўненасць, што для таго, каб пабудаваць устойлівае супрацоўніцтва, Беларусі і Хабараўскаму краю неабходны сумесныя праекты. "Шэраг такіх праектаў ужо з'явіўся, і яны знаходзяцца ў стадыі прапрацоўкі. У першую чаргу яны датычацца сферы АПК. У прыватнасці, флагманскім праектам у рэгіёне можа стаць беларуска-расійскі аграрны кластар. Патрэбнасць Хабараўскага края ў харчовай прадукцыі вельмі высокая, аб'ём уласнай вытворчасці пакрывае не больш за 10 працэнтаў патрэбнасцей рэгіёна па малочнай і мясной прадукцыі. Для забеспячэння больш высокага ўзроўню харчовай бяспекі ў рамках сумеснага кластара будзе пабудавана некалькі малочных і мясных ферм па беларускай тэхналогіі. Першыя праекты будуць рэалізаваны ў 2024-2025 гадах, буйнейшыя фермы створаць у 2026-2027 годзе. Найбольш значны малочны праект ацэньваецца ў 3 млрд расійскіх рублёў, больш дробныя будуць каштаваць каля 500 млн рублёў кожны", - сказалі ў прэс-службе.
Паводле слоў пасла, Хабараўскі край выбіваецца ў лідары па тэмпах росту тавараабароту з Беларуссю: у 2022 годзе ён павялічыўся ў 2,4 раза, з пачатку бягучага года - яшчэ на 60 працэнтаў. "Пры гэтым напрамкаў супрацоўніцтва вельмі шмат, - падкрэслілі ў прэс-службе. - Напрыклад, фермеры Хабараўскага края гатовы закупляць у Беларусі абсталяванне для вытворчасці малака і сельгастэхніку. У сувязі з гэтым з'яўляецца мэтазгодным пашырэнне сеткі сэрвісных цэнтраў. Губернатар Хабараўскага края Міхаіл Дзегцяроў расказаў, што хабараўчане "падабралі партнёра, фінансава ўстойлівага, які мае цэхі, станкі, працоўныя рукі". Таму як толькі рашэнне будзе прынята, адбудзецца бурны рост паставак беларускай спецтэхнікі. У сітуацыі, што склалася на рынку, беларускія машынабудаўнікі канкурэнтаздольныя не толькі па якасці, але і па цане з кітайскімі пастаўшчыкамі машын і маюць на Далёкім Усходзе канкурэнтную перавагу".
Па выніках перагавораў ва ўрадзе Хабараўскага края Дзмітрый Крутой таксама выказаў упэўненасць, што да 40 працэнтаў рынку электратранспарту ў рэгіёне ў сярэднетэрміновай перспектыве маглі б заняць беларускія вытворцы: беларуская тэхніка вядома ў рэгіёне, што пацвердзіла праведзеная ў Хабараўску выстава-кірмаш беларускай прадукцыі, у тым ліку буйнагабарытнай тэхнікі.
"Яскравы прыклад - праграма абнаўлення гарадскога пасажырскага транспарту. Горад робіць значны ўпор на электрычныя мадэлі: тралейбусы, электробусы. Пілотны электробус будзе тут працаваць у зімовы перыяд", - расказаў пасол. Залогам гэтага з'яўляецца якасць прадукцыі, а таксама прымальная цана на беларускую тэхніку. Яшчэ адной перавагай беларускіх пастаўшчыкоў становіцца той факт, што вытворцы ідуць насустрач пажаданням кліентаў і адаптуюць мадэлі пад патрэбнасці рынку Хабараўскага края.
Са свайго боку хабараўчане выказалі гатоўнасць пастаўляць у Беларусь прадукцыю рыбаперапрацоўкі і морапрадуктаў.
Паводле слоў Міхаіла Дзегцярова, цікавасць у хабараўчан да беларускіх тавараў вельмі вялікая. "Упэўнены, мы будзем нарошчваць супрацоўніцтва і гандаль паміж нашымі краінамі і рэгіёнамі. Толькі за мінулы год пасля візіту дэлегацыі ўрада края ў Мінск па запрашэнні Прэзідэнта Беларусі аб'ём гандлю ў нас значна вырас. Думаю, што праз год беларускі бок прыме нас з нашай выстаўкай-кірмашом на беларускай зямлі. На восень 2024 года заплануем візіт нашых прадпрымальнікаў на беларускую зямлю і таксама здзівім беларусаў нашымі таварамі", - паабяцаў Міхаіл Дзегцяроў.
Акрамя перагавораў з кіраўніком рэгіёна і ўдзелу ў Далёкаўсходнім форуме прадпрымальнікаў праграма візіту Дзмітрыя Крутога прадугледжвала адкрыццё Дзён Беларусі ў Хабараўску, якія былі арганізаваны ў рамках двухбаковага міжурадавага пагаднення аб супрацоўніцтве ў гандлёва-эканамічнай, навукова-тэхнічнай, сацыяльнай, культурнай і іншых сферах. Пасол таксама наведаў шэраг прадпрыемстваў прамысловай сферы і АПК, азнаёміўся з дзейнасцю дылерскіх і сэрвісных цэнтраў беларускай тэхнікі.
версія для друку
зрабіць стартавай
дабавіць у выбранае