Бізнес-навіны

Ад прамкааперацыі да беспілотнікаў: якія праекты абмеркаваў Крутой з губернатарам Саратаўскай вобласці

Фота з архiва

25 верасня, Масква /Эдуард Півавар - БЕЛТА/. Перспектыўныя праекты супрацоўніцтва ў розных сферах абмеркаваны на перагаворах пасла Беларусі ў Расіі Дзмітрыя Крутога з губернатарам Саратаўскай вобласці Раманам Бусаргіным, паведамляе карэспандэнт БЕЛТА.

"Саратаўская вобласць на сённяшні дзень становіцца для Беларусі адным з ключавых расійскіх рэгіёнаў. У нас вельмі высокія лічбы тавараабароту. Фактычна за тры гады мы ў два разы павялічылі наш агульны абарот гандлю і ў гэтым годзе перасягнём планку $200 млн, - сказаў Дзмітрый Крутой журналістам па выніках перагавораў. - Вельмі добрае ў нас супрацоўніцтва ў сферы прамысловасці, улічваючы вялікі прамысловы патэнцыял Саратаўскай вобласці - ад нафтахіміі, атамнай энергетыкі да машынабудаўнічых вытворчасцей у плане кампанентаў. Саратаўская вобласць вельмі шмат купляе беларускай сельгастэхнікі: МАЗы, МТЗ, АМКАДОРы, камбайны "Гомсельмаш". Гэта значыць, практычна ўсе беларускія брэнды прысутнічаюць на гэтым рынку, і мы павінны падумаць, як гэту прысутнасць захаваць і ва ўмовах санкцыйнага націску, а недзе і пашырыць".

Пасол канстатаваў, што Саратаўская вобласць па аграпрамысловым патэнцыяле з'яўляецца адным з вядучых рэгіёнаў Расіі: тут збіраюць такую ж колькасць збожжа, як уся Беларусь пры такой жа колькасці раллі. "І для нас гэта вельмі ёмісты і важны рынак, на якім мы павінны быць сур'ёзна прадстаўлены", - адзначыў ён.

Гаворачы аб развіцці прамысловай кааперацыі, Дзмітрый Крутой нагадаў, што ў бакоў у 2015 годзе ўжо была спроба стварыць зборачную вытворчасць трактароў МТЗ у Саратаўскай вобласці. "Цяпер важна разабрацца, што не атрымалася ў тым праекце. І ўлічваючы тое, што ёсць добрыя прамысловыя пляцоўкі з інфраструктурай, можа, мы ад простага гандлю пяройдзем на наступны этап да сумеснай кааперацыйнай зборкі пэўных мадэлей трактароў альбо камбайнаў", - сказаў ён.

Далей дыпламат спыніўся на перспектывах супрацоўніцтва па развіцці транспартнай сеткі і інфраструктуры. "Гістарычны напрамак для Саратава - гэта развіццё электратранспарту, трамвайная тэматыка. Губернатар на нядаўнім дакладзе Прэзідэнту Расійскай Федэрацыі абазначыў яго як адзін з важнейшых, якарных праектаў, што датычацца не толькі набыцця трамваяў, але і мадэрнізацыі ўсёй інфраструктуры: амаль 70 км трамвайных пуцей, цягавых падстанцый. І беларускія вытворцы, якія маюць самыя сучасныя мадэлі і віды электратранспарту, маглі б паўдзельнічаць у рэалізацыі гэтага праекта ў нейкім пілотным выглядзе", - лічыць пасол.

Асобна на сустрэчы ўзнімалася пытанне ўдзелу беларускіх будаўнікоў у праектах, што рэалізуюцца ў Саратаўскай вобласці ў сферы дарожнага будаўніцтва і ўзвядзення сацыяльных аб'ектаў. "І апошні напрамак - гэта авіябудаўніцтва, беспілотнікі. На авіяцыйны завод у Энгельсе ажыццяўляюцца адзінкавыя пастаўкі беларускіх кампанентаў. Нам важна зразумець, дзе мы можам яшчэ прыбавіць. Губернатар анансаваў будаўніцтва вялікага цэнтра беспілотнікаў у Саратаве. Улічваючы кампетэнцыі Беларусі ў гэтай сферы, мы дамовіліся абмяняцца адпаведнымі інвестпраектамі", - рэзюмаваў Дзмітрый Крутой.

версія для друку

зрабіць стартавай

дабавіць у выбранае