Бізнес-навіны
Аб'ёмы закупак вугалю на БУТБ у студзені - маі выраслі ў два разы
Фота з архiва
16 чэрвеня, Мінск /Кар. БЕЛТА/. Аб'ёмы закупак вугалю на БУТБ у студзені - маі выраслі ў два разы ў параўнанні з аналагічным перыядам мінулага года, паведаміў карэспандэнту БЕЛТА прэс-сакратар БУТБ Раман Яніў.
"На Беларускай універсальнай таварнай біржы за студзень - май для патрэб унутранага рынку рэалізавана 510 тыс. т вугалю на суму Br75,6 млн. Гэта ў 2,2 раза больш у вартасным выражэнні, чым за той жа перыяд 2020 года, і ў 2,3 раза больш - у натуральным", - расказаў Раман Яніў.
Асноўныя пакупнікі гэтай прадукцыі на біржавых таргах - вытворцы цэменту, Беларуская чыгунка і цукровыя заводы. У якасці прадаўцоў вугалю выступаюць як беларускія кампаніі, так і замежныя пастаўшчыкі - пераважна з Расіі.
"Вугаль карыстаецца попытам у многіх галінах прамысловасці - ад чорнай металургіі да вытворчасці прадуктаў харчавання. На біржавых таргах рэалізуецца каменны вугаль і антрацыт, якія ў Беларусі не здабываюцца. На фоне росту прамысловай вытворчасці ў краіне патрэбнасць у вугалі прыкметна павысілася, што прама прапарцыянальна паўплывала на аб'ёмы здзелак па такім таварным напрамку. Пры гэтым айчынныя прадпрыемствы змаглі не толькі закупіць патрэбную ім колькасць тавару, але сэканоміць больш за Br2,3 млн за кошт канкурэнцыі сярод пастаўшчыкоў", - адзначыў прэс-сакратар.
Па выніках 5 месяцаў 2021 года абарот секцыі металапрадукцыі БУТБ, у рамках якой праводзяцца таргі вуглём, склаў Br794 млн, што на 45 працэнтаў больш за аналагічны паказчык 2020 года. Каля 78 працэнтаў ад агульнай сумы здзелак забяспечылі закупкі чорных металаў і вырабаў з іх.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.
версія для друку
зрабіць стартавай
дабавіць у выбранае