Падзеі

Ва Узброеныя Сілы Беларусі паступілі найноўшыя станцыі спадарожнікавай сувязі

Фота vpk.gov.by

15 сакавіка, Мінск /Кар. БЕЛТА/. У першай дэкадзе сакавіка пасля паспяховага правядзення дзяржаўных выпрабаванняў прынята на ўзбраенне і перададзена ў войскі лінейка найноўшых станцый спадарожнікавай сувязі. Такая інфармацыя размешчана на сайце Дзяржаўнага ваенна-прамысловага камітэта, паведамляе БЕЛТА.

Станцыі распрацаваны ў ААТ "АГАТ - сістэмы кіравання" - кіруючая кампанія холдынга "Геаінфармацыйныя сістэмы кіравання". Як растлумачылі ў Дзяржкамваенпраме, размова ідзе аб вузлавой і канцавой станцыях у стацыянарным і мабільным варыянце выканання, а таксама аб мабільных сродках для ўстаноўкі на бранябазе або аўтамабілях. "Тэхнічныя характарыстыкі і баявыя магчымасці станцый спадарожнікавай сувязі забяспечваюць работу створанай сістэмы сувязі ў новых, раней не выкарыстоўваемых рэжымах работы, у складанай канфігурацыі і архітэктуры пабудовы, у розных варыянтах прымянення, дыяпазонах частот і з высокай перашкодаабароненасцю", - падкрэслілі ў камітэце.

У Дзяржкамваенпраме нагадалі, што задачу па распрацоўцы і асваенні ў вытворчасці лінейкі такіх станцый для УС паставіў кіраўнік дзяржавы ў красавіку 2016 года, калі наведваў наземны комплекс кіравання нацыянальнай спадарожнікавай сістэмы сувязі і вяшчання. "Сярод патрабаванняў, што прад'яўляюцца да распрацоўваемых узораў сродкаў спадарожнікавай сувязі, - забеспячэнне іх работы не толькі з айчынным спадарожнікам "Белінтэрсат-1", але і сатэлітамі краін, з якімі падпісаны каардынацыйныя пагадненні", - адзначылі ў ДВПК.

З завяршэннем гэтай распрацоўкі Беларусь атрымала магчымасць выкарыстоўваць групоўку касмічных апаратаў, наземны комплекс кіравання нацыянальнай спадарожнікавай сістэмы сувязі і вяшчання, мабільныя станцыі рознага прызначэння як адзіную інтэграваную сістэму. Прымяняюцца найноўшыя тэхналогіі і высакаскорасныя каналы сувязі з павышанай прапускной здольнасцю і ўстойлівасцю. Гэта дасць магчымасць вырашаць шырокі спектр задач у інтарэсах народнай гаспадаркі і гарантавання нацыянальнай бяспекі. Акрамя таго, з'явілася ўнікальная магчымасць перадачы ў многія рэгіёны свету вялікіх патокаў інфармацыі ў рэальным маштабе часу без выкарыстання інтэрнэту.

Шэраг узораў рухомых спадарожнікавых станцый сувязі прыме ўдзел у парадзе войскаў Мінскага гарнізона, прысвечаным 75-годдзю Перамогі савецкага народа ў Вялікай Айчыннай вайне.

версія для друку

зрабіць стартавай

дабавіць у выбранае