Падзеі

Урад прымае меры па захаванні тэмпаў росту ВУП у 2018 годзе на ўзроўні 103,5 працэнта

26 лістапада, Мінск /Уладзімір Мацвееў - БЕЛТА/. Урад Беларусі працуе над тым, каб захаваць у бягучым годзе тэмпы росту валавога ўнутранага прадукту на ўзроўні 103,5 працэнта. Аб гэтым сёння на нарадзе ў кіраўніка дзяржавы далажыў прэм'ер-міністр Сяргей Румас, перадае карэспандэнт БЕЛТА.

"Па выніках года ўрад прымае меры па захаванні тэмпаў росту ВУП на ўзроўні 103,5 працэнта. Аднак некаторыя вобласці не пацвярджаюць выкананне прагнозу па валавым рэгіянальным прадукце. Сапраўды, кампенсаваць зніжэнне вытворчасці сельгаспрадукцыі і нагнаць гэта адставанне няпроста. Мы разам з аблвыканкамамі працуем над гэтай задачай", - сказаў Сяргей Румас.

Паводле яго слоў, эканоміка развіваецца ў рамках зацверджанага на 2018 год прагнозу. Па выніках работы за 10 месяцаў усе 7 ключавых паказчыкаў эфектыўнасці работы ўрада і Нацыянальнага банка выкананы. Забяспечваецца гадавы прагноз інтэгральнага паказчыка развіцця эканомікі - ВУП. "У межах прагнозу па валавым рэгіянальным прадукце знаходзяцца тры рэгіёны - Мінск, Віцебская і Гродзенская вобласць. Ніжэй за прагноз, але не вышэй за ўзровень мінулага года ідуць іншыя вобласці", - адзначыў прэм'ер-міністр.

Ён падкрэсліў, што найбольш адчувальнымі пытаннямі для насельніцтва, па якіх яно ацэньвае вынікі работы эканомікі, з'яўляюцца ўзровень зарплат і пенсій, пытанні занятасці, цэн і стабільнасці курса беларускага рубля.

"Што датычыцца даходаў насельніцтва, рэальны рост зарплаты за 10 месяцаў бягучага года склаў 112,3 працэнта (да аналагічнага ўзроўню мінулага года. - Заўвага БЕЛТА). Гэта значна перавышае прагнозны параметр. Сярэдняя намінальная зарплата ў цэлым па краіне ў кастрычніку без 30 капеек склала Br1 тыс. У рэальным сектары эканомікі зарплата вышэйшая - Br1,075 тыс. У цэлым у чацвёртым квартале мэтавая задача - Br1 тыс. у краіне будзе забяспечана", - заявіў Сяргей Румас.

Ён удакладніў, што ў бюджэтнай сферы зарплата па выніках кастрычніка павялічылася і склала Br769, што адпавядае 77 працэнтам сярэдняй зарплаты па краіне. У чацвёртым квартале заработная плата бюджэтнікаў ацэньваецца на ўзроўні Br800.

версія для друку

зрабіць стартавай

дабавіць у выбранае