Падзеі

31 мая, Мінск /Кар. БЕЛТА/. Пастановай Савета Міністраў ад 30 мая нумар 419 адобрана краінавая праграма Дзіцячага фонду ААН (ЮНІСЕФ) для Рэспублікі Беларусь на 2016-2020 гады, паведамілі БЕЛТА ў прэс-службе беларускага ўрада.

Дзейнасць ЮНІСЕФ па праграме будзе сканцэнтравана на падрыхтоўцы і рэалізацыі праектаў міжнароднай тэхнічнай дапамогі па чатырох асноўных напрамках: стварэнне бяспечнага і падтрымліваючага асяроддзя для дзіцяці, рэалізацыя правоў дзяцей з асаблівасцямі псіхафізічнага развіцця і інваліднасцю, стварэнне спрыяльнага асяроддзя для зніжэння неабароненасці падлеткаў і іх паўнацэннага ўдзелу ў прыняцці рашэнняў, вывучэнне становішча дзяцей і ўмацаванне партнёрства па рэалізацыі правоў дзяцей.

Рэсурсная база праграмы складзе $8,465 млн, з якіх $4,465 млн будуць выдзелены з рэгулярных рэсурсаў ААН і $4 млн будуць прадастаўлены іншымі донарамі міжнароднай тэхнічнай дапамогі. Усе праекты, якія плануюцца да рэалізацыі па праграме, будуць адобраны ў адпаведнасці з патрабаваннямі заканадаўства Беларусі.

Каардынацыя і эфектыўны кантроль за рэалізацыяй праграмы ўскладзены на Міністэрства замежных спраў.

Таксама пастановай адобраны некалькі праектаў міжнароднай тэхнічнай дапамогі. У прыватнасці, размова ідзе аб праграме "Удасканаленне прафесійных магчымасцей беларускага рэгулюючага органа ў галіне ядзернай і радыяцыйнай бяспекі і яго сістэмы тэхнічнай падтрымкі". Аб'ём фінансавання праекта - 324 тыс. еўра з боку Міжнароднага агенцтва па атамнай энергіі. Праект накіраваны на развіццё нацыянальнай рэгулюючай інфраструктуры ў галіне ядзернай і радыяцыйнай бяспекі.

Адобрана праграма "Падтрымка людскіх рэсурсаў і развіццё інфраструктуры для ўводу ў эксплуатацыю першай АЭС" з аб'ёмам фінансавання 252 тыс. еўра з боку МАГАТЭ. Праект накіраваны на ўдасканаленне сістэмы падрыхтоўкі кадраў для забеспячэння надзейнай эксплуатацыі АЭС. Плануюцца распрацоўка і ўкараненне эфектыўнай сістэмы кіравання чалавечымі рэсурсамі, будуць створаны вучэбныя праграмы для персаналу АЭС.

Яшчэ адна адобраная праграма - "Распрацоўка пілотнага праекта для абароны правоў дзяцей з цяжкімі формамі інваліднасці і дзяцей з абмежаванымі магчымасцямі ў Беларусі". Аб'ём фінансавання праекта - каля 241 тыс. еўра з боку Еўрапейскага саюза. Праект накіраваны на абарону правоў дзяцей з сур'ёзнымі парушэннямі здароўя і дзяцей з абмежаванымі магчымасцямі, а таксама іх сем'яў. Запланавана правядзенне комплексу мерапрыемстваў па вывучэнні замежнага вопыту абароны правоў дзяцей, распрацоўцы і ўкараненні новай мадэлі абароны правоў дзяцей з цяжкімі захворваннямі.

Акрамя таго, урад адобрыў праграму "Распрацоўка падыходаў да гарманізацыі комплексных стратэгій інтэрнацыяналізацыі ў галіне вышэйшай адукацыі, даследаванняў і інавацый у ЕС і краінах-партнёрах". Аб'ём фінансавання - каля 130 тыс. еўра з боку ЕС па праграме "Эразмус+". Па праекце будзе падрыхтавана стратэгія інтэрнацыяналізацыі сістэмы вышэйшай адукацыі на нацыянальным узроўні. У мэтах павышэння кваліфікацыі адміністрацыйнага персаналу ўніверсітэтаў будзе арганізаваны шэраг семінараў і канферэнцый у Беларусі, Расіі і краінах ЕС.

Таксама адобрана праграма "Стварэнне сеткавай інфраструктуры для падтрымкі інавацыйнага прадпрымальніцтва моладзі на платформах вытворчых лабараторый" аб'ёмам фінансавання праекта каля 127 тыс. еўра з боку ЕС па праграме "Эразмус+". Плануюцца адкрыццё на базе ўніверсітэтаў вытворчых лабараторый, іх аснашчэнне інавацыйным абсталяваннем, а таксама стварэнне інфраструктуры падтрымкі супрацоўніцтва ўніверсітэтаў і прамысловасці. Акрамя таго, у час рэалізацыі праекта будуць распрацаваны вучэбныя матэрыялы і планы з выкарыстаннем падыходаў, што адпавядаюць патрабаванням Балонскага працэсу.

Гэта пастанова ўступае ў сілу з дня яе прыняцця.