Падзеі
У МЗС выказаліся аб чаканнях беларускага боку ад работы новага ўрада Літвы
Фота з архiва
12 снежня, Мінск /Кар. БЕЛТА/. У МЗС Беларусі адказалі на пытанне аб чаканнях беларускага боку ад работы новага ўрада Літвы. Адпаведныя заявы для СМІ зрабіў прэс-сакратар МЗС Анатоль Глаз, паведамляе БЕЛТА.
"Палітыка Беларусі заўсёды была накіравана на фарміраванне пояса добрасуседства і развіццё нармальных адносін з суседзямі. Мы не ініцыявалі абвастрэнне або эскалацыю. Мы не раз пра гэта не толькі гаварылі, але і дзейнічалі. Вазьміце хаця б бязвізавы рэжым для грамадзян суседніх краін, які згодна з рашэннем Прэзідэнта Беларусі будзе актуальны і ў наступным годзе. Мы не саромеемся прызнаваць важнасць для нашых людзей і бізнесу нармальных гандлёва-эканамічных адносін, нармальнага рэжыму перасячэння граніцы, транзіту, супрацоўніцтва ў іншых практычных галінах з Літвой. Беларусь заўсёды гатова пазітыўна адрэагаваць на любы канструктыўны крок сваіх суседзяў", - сказаў прадстаўнік МЗС.
Ён падкрэсліў, што ў беларусаў абсалютна нармальныя адносіны з самімі літоўцамі: "Яны ездзяць да нас, мы ездзім да іх, людзі гандлююць, узаемадзейнічаюць, заводзяць сем'і і хочуць нармальна жыць далей".
"Што павінны рабіць у гэтай сітуацыі палітыкі? Вядома, падтрымліваць такія імкненні свайго народа і садзейнічаць ім. Аднак актыўнасць папярэдняга ўрада ішла ўразрэз з гэтымі відавочнымі інтарэсамі. А асобныя актары дзеля сваіх сквапных інтарэсаў наогул усё рабілі на шкоду. Вось мінулыя парламенцкія выбары выразна і паказалі, што літоўцы супраць гэтага, яны хочуць перамен, ім патрэбна зусім іншая ўлада. У выніку грамадзяне краіны, якія цудам перанеслі на сабе чатырохгадовае кіраванне кансерватараў, зрабілі свой выбар на карысць іншых палітычных сіл", - заявіў Анатоль Глаз.
Паводле яго слоў, сярод новых асоб ёсць людзі, здольныя інакш паглядзець на вырашэнне ўнутраных праблем Літвы і яе пазіцыянаванне ў свеце, у тым ліку на адносіны з Беларуссю або, напрыклад, з Кітаем. "Яны маглі б крытычна ацаніць маштабы ўрону, нанесенага кансерватарамі самой Літве і яе народу. Уласна, пра гэта зусім нядаўна гаварыў міністр замежных спраў Максім Рыжанкоў, калі публічна звярнуўся да жыхароў Літвы як сапраўдных носьбітаў суверэнітэту з прапановай рацыянальна разабрацца і сказаць сваё важкае слова ў абарону цывілізаваных адносін са сваімі суседзямі. І мы бачым, што літоўцы думаюць гэтак жа", - сказаў прадстаўнік беларускага знешнепалітычнага ведамства.
Разам з тым ён заявіў, што асаблівасць сучаснай еўрапейскай дэмакратыі - паказушнасць, і на справе народна выбраным дэмакратычным сілам не дадуць кіраваць краінай. "Шэраг палітычных лідараў не пусцілі ва ўрад, а ў праграму звонку навязалі антыбеларускія і антырасійскія наратывы. Усё гэта загоніць сацыяльна-эканамічную сітуацыю ў Літве ў яшчэ больш глыбокі крызіс. Можна падумаць, што іншых праблем, напрыклад, з энергетыкай, цэнамі, інфраструктурай, беспрацоўем або адтокам насельніцтва, аховай здароўя ў літоўцаў няма", - заўважыў Анатоль Глаз.
Ён лічыць, што гэта будзе адмоўна ўплываць на дабрабыт, камфорт і бяспеку саміх літоўцаў. "У выніку не выключана, што літоўскі народ хутка зноў вымушаны будзе сказаць сваё слова, і яно будзе больш важкім. А сапраўдную народную дэмакратыю Беларусь заўсёды падтрымае", - рэзюмаваў прэс-сакратар.
версія для друку
зрабіць стартавай
дабавіць у выбранае