Падзеі

У Беларусі выступілі за ўзаемадзеянне з заходнімі суседзямі ў барацьбе з нелегальнай міграцыяй

Юрый Амбразевіч і Эмі Поўп. Фота МЗС

14 чэрвеня, Мінск /Кар. БЕЛТА/. У Беларусі выступаюць за ўзаемадзеянне з заходнімі суседзямі ў барацьбе з нелегальнай міграцыяй. Аб гэтым заявіў намеснік міністра замежных спраў Юрый Амбразевіч на сустрэчы ў Жэневе з намеснікам генеральнага дырэктара Міжнароднай арганізацыі па міграцыі (МАМ) Эмі Поўп, паведамілі БЕЛТА ў прэс-службе знешнепалітычнага ведамства.

У час сустрэчы бакі абмеркавалі шырокі спектр пытанняў супрацоўніцтва, асобна спыніўшыся на тэме барацьбы з гандлем людзьмі. Дасягнута дамоўленасць аб далейшым узаемадзеянні па антытрафікінгавай праблематыцы.

"Адзначана супадзенне меркаванняў адносна ўплыву міграцыі і мабільнасці на ўстойлівае эканамічнае развіццё дзяржаў. Юрый Амбразевіч давёў да кіраўніцтва МАМ пазіцыю Беларусі пра бягучы стан пытання з перамяшчэннем нелегальных мігрантаў па беларускай тэрыторыі ў напрамку Заходняй Еўропы. Выказаў заклапочанасць патэнцыяльнай летняй эскалацыяй праблемы і адсутнасцю якога-небудзь узаемадзеяння Польшчы, Літвы і Латвіі з урадам Беларусі па гэтай тэме, вырашэнне якой не можа быць забяспечана толькі аднабаковымі намаганнямі Мінска", - расказалі ў прэс-службе МЗС.

У Жэневе намеснік міністра замежных спраў Беларусі сустрэўся таксама з генеральным дырэктарам Аддзялення ААН у Жэневе, генеральным сакратаром Канферэнцыі па раззбраенні і асабістым прадстаўніком генеральнага сакратара ААН Таццянай Валавой. Яны пацвердзілі ўпэўненасць у неабходнасці процідзеяння працэсам дэградацыі сістэмы міжнароднай бяспекі праз умацаванне шматбаковых інстытутаў і перагаворных пляцовак.

"Субяседнікі абмеркавалі прычыны ўзнікнення і шляхі выхаду з сучаснага крызісу міжнароднай бяспекі, у тым ліку ў кантэксце сітуацыі ва Украіне. Беларускі дыпламат падкрэсліў неабходнасць пошуку мірных шляхоў урэгулявання гэтага канфлікту", - адзначылі ў міністэрстве.

Юрый Амбразевіч на сустрэчах у Жэневе давёў да кіраўніцтва ААН, МАМ, як і напярэдадні да кіраўніцтва МКЧК, УВКБ і УВПЧ ААН, заклапочанасць штучнай палітызацыяй шэрагам замежных дзяржаў і дэструктыўных грамадскіх арганізацый у гэтых краінах пытання выканання Беларуссю яе міжнародных абавязацельстваў, у прыватнасці ў галіне міжнароднага гуманітарнага права. "Асаблівая ўвага субяседнікаў звернута на ўсё большую палітызацыю тэмы дзяцей у міжнародным парадку дня, у тым ліку беларускай практыкі прыёму дзяцей з замежных дзяржаў на аздараўленне ў летніх лагерах у Беларусі. Заклікаў ААН кіравацца ў сваёй рабоце выключна інфармацыяй з першых вуснаў і ўказаў на адкрытасць урада Беларусі ў гэтым пытанні", - дадалі ў МЗС.

версія для друку

зрабіць стартавай

дабавіць у выбранае