Падзеі

У Беларусі пашыраць пералік ліцэяў, выпускнікі якіх будуць паступаць у ВНУ без экзаменаў

Фота з архiва

9 сакавіка, Мінск /Кар. БЕЛТА/. У Беларусі пашыраць пералік ліцэяў, выпускнікі якіх будуць паступаць у ВНУ без экзаменаў. Аб гэтым паведаміў міністр адукацыі Андрэй Іванец на падагульняючай калегіі камітэта па адукацыі Мінгарвыканкама, якая прайшла ў сталічнай гімназіі нумар 41, перадае карэспандэнт БЕЛТА.

"Ужо з гэтага года ў адпаведнасці з указам кіраўніка дзяржавы выпускнікі шэрага ліцэяў устаноў вышэйшай  адукацыі маюць магчымасць без экзаменаў пры выдатнай паспяховасці - гэта 8 балаў па ўсіх агульнаадукацыйных прадметах і 9 балаў па профільных прадметах - паступаць у адпаведныя ўніверсітэты без экзаменаў. Такіх ліцэяў у нас вызначаны тры: ліцэі БДУ, Беларуска-Расійскага ўніверсітэта і Палескага дзяржуніверсітэта. Мы правялі дасканалы аналіз і бачым, што сёння фактычна кожны другі выпускнік гэтых ліцэяў мае права без экзаменаў паступіць у адпаведную профільную ўстанову адукацыі", - расказаў Андрэй Іванец.

Міністр адзначыў вельмі шырокі выбар спецыяльнасцей, даступны гэтай катэгорыі выпускнікоў. "Фактычна гэтыя маладыя людзі могуць паступаць без экзаменаў на любую спецыяльнасць, на любы факультэт, дзе профільны прадмет з'яўляецца першым для паступлення і па ім 9 балаў. Сёння мы праводзім вялікую работу з бацькоўскай грамадскасцю, з самімі выпускнікамі для таго, каб яны маглі выкарыстаць гэту ўнікальную магчымасць. Мяркуем, пасля прымянення такой нормы ў бягучым годзе мы правядзём сур'ёзны аналіз і ў наступным годзе распрацуем адзіныя падыходы для вызначэння пераліку такіх ліцэяў і будзем пашыраць гэту форму работы", - праінфармаваў ён.

версія для друку

зрабіць стартавай

дабавіць у выбранае