Падзеі

Рыжанкоў назначаны міністрам замежных спраў Беларусі

27 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка назначыў Максіма Рыжанкова міністрам замежных спраў Беларусі, перадае карэспандэнт БЕЛТА.

Да гэтага часу Максім Рыжанкоў займаў пасаду першага намесніка кіраўніка Адміністрацыі Прэзідэнта.

"Ведаю, што ўвесь гэты час вы не маглі адарвацца (і добра) ад сваёй "альма-матар" і ранейшай працы (размова пра вялікі вопыт папярэдняй работы Максіма Рыжанкова ў сістэме МЗС. - Заўвага БЕЛТА). Але мяне не гэта вабіць у вас. Вы - чалавек жорсткі, патрабавальны. МЗС трэба прыводзіць да розуму. Гавару адкрытай мовай: узварухнуць МЗС трэба, каб яно пачало працаваць", - сказаў кіраўнік дзяржавы.

Аляксандр Лукашэнка запатрабаваў у гэтым плане дзейнічаць сумесна з прэм'ер-міністрам Раманам Галоўчанкам. "Так, каб МЗС займалася сваімі пытаннямі і рэалізоўвала тое, што яно павінна рэалізаваць для краіны. Усе пытанні, - сказаў беларускі лідар. - І Снапкова (першага віцэ-прэм'ера Мікалая Снапкова, які курыруе адносіны з Кітаем. - Заўвага БЕЛТА) па Кітаі, і Крутога (новы кіраўнік Адміністрацыі Прэзідэнта, а раней - пасол у Расіі Дзмітрый Крутой. - Заўвага БЕЛТА) па Расіі. І на далёкай дузе адказны ў нас будзе міністр (Індыя таксама ў цябе будзе), і прэм'ер-міністр. Гэта далёкая дуга. Усё павінна сыходзіцца ў МЗС".

Кіраўнік дзяржавы асабліва папярэдзіў, што "ніхто не павінен за Міністэрства замежных спраў выконваць работу і ніхто не павінен падмінаць, нахіляць міністра і міністэрства". У гэтым плане ён адзначыў якасці характару Максіма Рыжанкова, з якім такія спробы ў прынцыпе не будуць мець поспеху. "Гэта таксама вельмі важна. Астатняе абмяркуем. Трэба актывізавацца і прымусіць міністэрства працаваць", - падкрэсліў Аляксандр Лукашэнка.

Асобна Прэзідэнт выказаўся пра кадры ў міністэрстве: "Шанц дайце ўсім. Ведаю, што там няпростая абстаноўка. Усім дайце (шанц. - Заўвага БЕЛТА), але той, хто не хоча працаваць, і той, хто мяне сёння не пачуе, яны працаваць не павінны".

Біяграфія Рыжанкова М.У.

Рыжанкоў Максім Уладзіміравіч нарадзіўся ў 1972 годзе ў Мінску.

У 1994 годзе скончыў Беларускі дзяржаўны ўніверсітэт, у 2003 годзе - Акадэмію кіравання пры Прэзідэнце Рэспублікі Беларусь.

У 1994-1996 гадах - супрацоўнік цэнтральнага апарату Міністэрства замежных спраў Рэспублікі Беларусь.

З 1996 па 2000 год - супрацоўнік пасольства Рэспублікі Беларусь у Дзяржаве Ізраіль.

У 2000-2003 гадах - начальнік аддзела АБСЕ і Савета Еўропы Міністэрства замежных спраў Рэспублікі Беларусь.

З 2003 па 2005 год - саветнік-пасланнік пасольства Рэспублікі Беларусь у Рэспубліцы Польшча.

З 2005 па 2006 год - начальнік упраўлення Амерыкі Міністэрства замежных спраў Рэспублікі Беларусь.

У 2006-2012 гадах - начальнік упраўлення знешняй палітыкі Адміністрацыі Прэзідэнта Рэспублікі Беларусь.

У 2012-2014 гадах - памочнік Прэзідэнта Рэспублікі Беларусь па пытаннях фізкультуры, спорту і развіцця турызму.

У 2015-2016 гадах - першы віцэ-прэзідэнт НАК Беларусі.

З 2016 года па чэрвень 2024 года - першы намеснік кіраўніка Адміністрацыі Прэзідэнта Рэспублікі Беларусь.

У чэрвені 2024 года назначаны міністрам замежных спраў Рэспублікі Беларусь.

Узнагароджаны ордэнам Пашаны.

версія для друку

зрабіць стартавай

дабавіць у выбранае