Падзеі

13 снежня, Мінск /Міхаіл Маціеўскі - БЕЛТА/. Урад Беларусі распрацаваў новыя падыходы па забеспячэнні росту зарплаты вучоных. Аб гэтым Прэзідэнт Беларусі Аляксандр Лукашэнка паведаміў сёння ў час выступлення на ІІ З'ездзе вучоных, перадае карэспандэнт БЕЛТА.

"Урад прадставіў мне на разгляд праект указа, у якім прапануюцца новыя падыходы па забеспячэнні росту заработнай платы работнікам навуковых арганізацый", - сказаў Аляксандр Лукашэнка.

Разам з тым кіраўнік дзяржавы звярнуў увагу, што работа над гэтым дакументам вялася доўгія месяцы, і калі б не з'езд вучоных, то так і не была б завершана. "З нашай апошняй сустрэчы прайшоў амаль год. І вы, вучоныя, разам з нашымі бюракратамі ва ўрадзе і іншымі чыноўнікамі за год не змаглі выканаць даручэнні Прэзідэнта, так патрэбныя вам: жыллё, зарплата, сродкі фінансавання і гэтак далей. Два дні таму паступілі на стол Прэзідэнту гэтыя дакументы", - канстатаваў беларускі лідар.

Аляксандр Лукашэнка падкрэсліў, што павышэнне сацыяльнага статусу вучонага, стварэнне магчымасцей для яго самарэалізацыі і прафесійнага росту - актуальная задача для гэтай сферы. "Наша грамадства павінна разумець каштоўнасць ведаў. Па сутнасці, усё сказанае можна звесці да адной простай формулы - займацца навукай павінна быць прэстыжна", - адзначыў ён.

З боку дзяржавы аказваецца падтрымка навуковым работнікам. Так, нядаўна Прэзідэнтам падпісана распараджэнне аб назначэнні стыпендый таленавітым маладым вучоным на 2018 год.