Падзеі

Праект указа па выключэнні нядобрасумленнага пасрэдніцтва пры закупках абмяркоўваецца на нарадзе ў Лукашэнкі

13 студзеня, Мінск /Кар. БЕЛТА/. Праект указа, які ў тым ліку прадугледжвае выключэнне нядобрасумленнага пасрэдніцтва пры закупках абмяркоўваецца на нарадзе ў Прэзідэнта Беларусі Аляксандра Лукашэнкі з кіраўніцтвам Савета Міністраў, перадае карэспандэнт БЕЛТА.

Кіраўнік дзяржавы падкрэсліў, што сістэма закупак заўсёды была аб'ектам яго пільнай увагі, паколькі з'яўляецца адным са значных інструментаў эканамічнай палітыкі. "Мной не раз даваліся даручэнні аб яго выкарыстанні для павышэння канкурэнтаздольнасці эканомікі, эфектыўнага расходавання грашовых сродкаў і недапушчэння розных шэрых схем", - сказаў Прэзідэнт.

Ён адзначыў, што ўрадам падрыхтаваны праект указа, які дасць магчымасць выключыць, як лічыць урад, нядобрасумленнае пасрэдніцтва і ўдасканаліць сістэму закупак за кошт бюджэтных і ўласных сродкаў арганізацый.

"Аднак пры любых навацыях павінна быць забяспечана бесперабойнасць працэсаў у гаспадарчай дзейнасці прадпрыемстваў з адначасовай эканоміяй грашовых сродкаў", - падкрэсліў беларускі лідар.

Як адзначыў на нарадзе міністр антыманапольнага рэгулявання і гандлю Аляксей Багданаў, на разгляд кіраўніка дзяржавы ўносіцца праект указа па ўдасканаленні заканадаўства ў галіне закупак. "Тыя новаўвядзенні, якія прапануецца ўнесці, дадуць магчымасць сэканоміць бюджэтныя сродкі і павялічыць долю айчынных тавараў пры ажыццяўленні дзяржаўных закупак. Першае, што прапануецца, - забарона на ўдзел у дзяржзакупках афіліраваных асоб", - сказаў Аляксей Багданаў.

Ён адзначыў, што менавіта афіліраваныя змовы - гэта адзін з карупцыйных складнікаў, які прыводзіць да значнага завышэння цэн.

Яшчэ адна навацыя - аперацыі па арэндзе і лізінгу павінны будуць праводзіцца на конкурснай аснове. "Мы гэтым выключым тыя выпадкі, калі купляецца імпартнае абсталяванне або тэхніка ў абход конкурсных працэдур і без удзелу беларускіх пастаўшчыкоў", - сказаў міністр.

Аляксандр Лукашэнка ў сувязі з гэтым звярнуў увагу, што ў выніку прыняцця адпаведны дакумент павінен займець дзейсны эфект, на справе садзейнічаць устараненню існуючых недахопаў. "Барані бог вам і іншым давядзецца канстатаваць факт, што мы гэтым не дабіліся жаданага", - папярэдзіў беларускі лідар.

версія для друку

зрабіць стартавай

дабавіць у выбранае