Падзеі

Петрышэнка аб задачах аховы здароўя: адна з галоўных - даступнасць у рэгіёнах спецыялізаванай дапамогі

19 мая, Мінск /Кар. БЕЛТА/. У ахове здароўя ў бягучай пяцігодцы адна з важных задач - удасканаленне даступнасці спецыялізаванай высокакваліфікаванай медыцынскай дапамогі ў рэгіёнах. Аб гэтым заявіў сёння намеснік прэм'ер-міністра Ігар Петрышэнка на сумесным пасяджэнні Палаты прадстаўнікоў і Савета Рэспублікі Нацыянальнага сходу сёмага склікання, перадае карэспандэнт БЕЛТА.

Ігар Петрышэнка выступіў перад парламентарыямі з дакладам аб развіцці сацыяльнай сферы Рэспублікі Беларусь. "Устойлівасць функцыянавання нацыянальнай сістэмы аховы здароўя грунтуецца на прынцыпах высокага ўзроўню бюджэтнага фінансавання галіны (4,4 працэнта ВУП на 2021 год), развіцця матэрыяльна-тэхнічнай базы і ўмацавання кадравага патэнцыялу. 2020 год і перыяд 2021 года паказалі сталасць айчыннай сістэмы аховы здароўя. Забяспечана даступнасць якаснай дапамогі грамадзянам незалежна ад месца іх пражывання. Ключавая роля ў гэтым належыць раённаму звяну аховы здароўя. Прадаўжаецца рэалізацыя праекта "Клапатлівая паліклініка" і ўкараненне выязной формы работы з прымяненнем перасовачных медыцынскіх комплексаў для аказання дапамогі жыхарам аддаленых сельскіх населеных пунктаў", - расказаў віцэ-прэм'ер.

У 2020 годзе поўнасцю завершана ўкараненне інстытута ўрача агульнай практыкі. У амбулаторных установах аховы здароўя працуе больш за 2,5 тыс. каманд, якія складаюцца з урача, памочніка ўрача і медыцынскай сястры. Узяты курс на развіццё міжраённых і міжрэгіянальных цэнтраў на базе 143 устаноў аховы здароўя. "Галоўнае тут - захаванне правіла "Залатой гадзіны". Зменшыць чэргі на высокатэхналагічнае абследаванне і лячэнне, забяспечыць кансультатыўную дапамогу пацыентам, для якіх паездка ў абласны цэнтр або сталіцу праблематычная", - дадаў Ігар Петрышэнка.

Пастаянная ўвага да развіцця высокатэхналагічнай медыцынскай дапамогі дала магчымасць менш як за 10 гадоў укараніць практычна ўсе новыя метады такой дапамогі як на рэспубліканскім, так і абласным узроўні. У першую чаргу гэта датычыцца кардыяхірургіі і эндапратэзавання суставаў.

версія для друку

зрабіць стартавай

дабавіць у выбранае