Падзеі

Пастаянны прадстаўнік Беларусі выбрана старшынёй Камісіі па папярэджанні злачыннасці ЭКАСАС

Алена Купчына. Фота з архіва

10 снежня, Мінск /Кар. БЕЛТА/. Пастаянны прадстаўнік Беларусі пры міжнародных арганізацыях у Вене Алена Купчына выбрана старшынёй Камісіі па папярэджанні злачыннасці і крымінальным правасуддзі Эканамічнага і сацыяльнага савета ААН (ЭКАСАС). Такое рашэнне было прынята ў час 27-й адноўленай сесіі камісіі, якая адбылася 6-7 снежня ў Вене. Аб гэтым БЕЛТА паведамілі ў прэс-службе беларускага МЗС.

Прадстаўнік Беларусі быў выбраны на пасаду кіраўніка функцыянальнай камісіі ЭКАСАС ААН упершыню. Алена Купчына будзе займаць гэту пасаду да сярэдзіны снежня 2019 года. У беларускім знешнепалітычным ведамстве расказалі аб асноўных напрамках дзейнасці камісіі на наступны год. "Яна будзе сканцэнтравана на ацэнцы ўкладу папярэджання злачыннасці і эфектыўнай барацьбы з ёй для дасягнення Мэт устойлівага развіцця, абмеркаванні падыходаў да папярэджання злачынстваў, якія ўчыняюцца на глебе нецярпімасці і дыскрымінацыі", - адзначылі ў МЗС. Акрамя таго, камісія будзе займацца падрыхтоўкай Кангрэса ААН па папярэджанні злачыннасці і крымінальным правасуддзі, які адбудзецца ў 2020 годзе ў Японіі.

ЭКАСАС займае цэнтральнае месца ў дзейнасці сістэмы ААН па развіцці ўсіх трох аспектаў устойлівага развіцця - эканамічнага, сацыяльнага і экалагічнага. У склад савета ўваходзяць восем функцыянальных камісій, дзве з якіх - па папярэджанні злачыннасці і крымінальным правасуддзі і па наркатычных сродках - працуюць на базе аддзялення ААН у Вене.

Камісія па папярэджанні злачыннасці - цэнтральны орган сістэмы ААН, які адказвае за фармуляванне міжнародных падыходаў у галіне папярэджання злачыннасці і ажыццяўлення крымінальнага правасуддзя, у тым ліку ў такіх сферах, як барацьба з гандлем людзьмі, транснацыянальнай арганізаванай злачыннасцю і карупцыяй. Камісія вядзе маніторынг прымянення адпаведных стандартаў і норм ААН, распрацоўвае рэкамендацыі па процідзеянні новым і ўзнікаючым формам злачыннасці.

У камісію ўваходзяць 40 краін, якія прадстаўляюць усе рэгіёны свету. Беларусь з'яўляецца яе членам з 2010 года, а ў красавіку 2018 года яна была выбрана ў склад камісіі на наступныя тры гады.

версія для друку

зрабіць стартавай

дабавіць у выбранае