Падзеі

Падпісаны мемарандум аб абавязацельствах Беларусі ў працэсе далучэння да ШАС

4 ліпеня, Мінск /Кар. БЕЛТА/. Падпісаны мемарандум аб абавязацельствах Рэспублікі Беларусь у мэтах атрымання статусу дзяржавы - члена Шанхайскай арганізацыі супрацоўніцтва. Аб гэтым па выніках праведзенага ў відэафармаце пасяджэння Савета кіраўнікоў дзяржаў ШАС заявіў журналістам міністр замежных спраў Беларусі Сяргей Алейнік, перадае карэспандэнт БЕЛТА.

"У рамках саміту быў падпісаны мемарандум аб абавязацельствах Рэспублікі Беларусь у працэсе далучэння да арганізацыі ў якасці паўнапраўнай дзяржавы-члена. Гэты мемарандум падпісаны ўсімі без выключэння краінамі, падпісаны генеральным сакратаром арганізацыі. Далейшы працэс будзе звязаны з ратыфікацыяй гэтага мемарандума і ўсяго пакета нашых абавязацельстваў усімі краінамі-членамі", - расказаў кіраўнік МЗС.

Паводле яго слоў, як толькі працэс ратыфікацыі ўсімі краінамі будзе завершаны, можна будзе гаварыць аб паўнапраўным уступленні Беларусі ў ШАС: "Разлічваем, што гэта адбудзецца ў бліжэйшай перспектыве. З нашага боку ўся неабходная заканадаўчая работа праведзена. Размова ідзе аб адначасовай ратыфікацыі мемарандума і 47 пагадненняў, падпісаных у рамках ШАС дзяржавамі-членамі, да якіх Беларусь далучаецца ў рамках гэтага працэсу".

Сяргей Алейнік адзначыў, што ўсе лідары краін ШАС сыходзяцца ў сваіх ацэнках змяненняў, што адбываюцца ў свеце, і імкненні да пабудовы больш справядлівага светапарадку. "Сённяшні саміт пацвердзіў нацэленасць усіх без выключэння лідараў да большай з'яднанасці, большай салідарнасці, паважання карэнных інтарэсаў краін-удзельніц гэтай арганізацыі і далейшага паступальнага ўстойлівага развіцця ўсіх без выключэння краін-членаў", - сказаў ён.

Міністр заявіў, што Беларусь разглядае ШАС не толькі як дыялогавую пляцоўку, але і як арганізацыю, якая прадугледжвае практычныя напрамкі супрацоўніцтва. "Безумоўна, на першым плане сёння знаходзяцца пытанні ўмацавання бяспекі. Вельмі вялікая ўвага была ўдзелена развіццю гандлёва-эканамічнага супрацоўніцтва, нарошчванню гандлёвага патэнцыялу арганізацыі", - адзначыў Сяргей Алейнік.

Кіраўнік МЗС прывёў даныя, згодна з якімі цяпер аб'ём тавараабароту краін ШАС складае 20 працэнтаў ад сусветнага, а для Беларусі 70 працэнтаў тавараабароту прыпадае менавіта на членаў і партнёраў ШАС.

Акрамя пытанняў павелічэння гандлёвага патэнцыялу ШАС і зняцця існуючых бар'ераў, вялікая ўвага на саміце была ўдзелена транспартна-лагістычнаму складніку, тэматыцы разлікаў у нацыянальных валютах.

версія для друку

зрабіць стартавай

дабавіць у выбранае