Падзеі
Ордэнам Маці ў Беларусі ўзнагароджаны больш за 8,6 тыс. жанчын
8 сакавіка, Мінск /Кар. БЕЛТА/. У Беларусі ордэнам Маці ўзнагароджаны 8 619 жанчын, якія нарадзілі і дастойна выхавалі пяць і больш дзяцей, паведамілі карэспандэнту БЕЛТА ў аддзеле дзяржаўных узнагарод галоўнага ўпраўлення кадравай палітыкі Адміністрацыі Прэзідэнта.
У бягучым годзе гэтай узнагароды ўдастоены 93 жанчыны з розных рэгіёнаў Беларусі.
Гэты высокі знак мацярынскай доблесці быў заснаваны ўказам Прэзідэнта Беларусі ў 1995 годзе. З 2006 года шматдзетным маці, якія ўзнагароджваюцца ордэнам Маці, ажыццяўляецца аднаразовая грашовая выплата ў памеры пяціразовага бюджэту пражытачнага мінімуму ў сярэднім на душу насельніцтва (з лютага бягучага года БПМ складае Br180,10). Выплаты ажыццяўляюцца са сродкаў рэспубліканскага бюджэту. Акрамя таго, у рэгіёнах Беларусі рашэннем мясцовых выканаўчых і распарадчых органаў устаноўлены розныя дадатковыя формы заахвочвання для ўзнагароджаных гэтым ордэнам.
Так, у 2016 годзе ордэнам Маці ўзнагароджана 413 жанчын, агульная сума выплат дасягнула амаль Br354,8 тыс.
З верасня 2012 года жанчынам, якія нарадзілі і выхавалі дзевяць і больш дзяцей і ўзнагароджаны адной з такіх дзяржаўных узнагарод СССР або Рэспублікі Беларусь, як ордэн Маці, медаль "Медаль мацярынства", ордэн "Мацярынская слава", ордэн "Маці-гераіня", устанаўліваецца пенсія за асаблівыя заслугі перад Рэспублікай Беларусь.
Як праінфармавалі ў Міністэрстве працы і сацыяльнай абароны, у Беларусі расце колькасць шматдзетных сем'яў - на ўліку ў тэрытарыяльных цэнтрах сацыяльнага абслугоўвання насельніцтва знаходзіцца ўжо
88,5 тыс. сем'яў з трыма і больш дзецьмі, 57,2 працэнта нованароджаных з'яўляюцца другімі і наступнымі ў сваіх сем'ях. Агульны каэфіцыент нараджальнасці ў 2016 годзе склаў 12,4 на 1000 жыхароў (у 2015 годзе гэты паказчык складаў 12,5 праміле).
версія для друку
зрабіць стартавай
дабавіць у выбранае