Падзеі

Новыя экспертызы, універсітэцкія клінікі і права на рызыку. Што з'явіцца ў абноўленым законе аб ахове здароўя?

Фота з архiва

14 студзеня, Мінск /Кар. БЕЛТА/. Міністр аховы здароўя Дзмітрый Піневіч па выніках нарады ў Прэзідэнта Беларусі Аляксандра Лукашэнкі, дзе абмяркоўваліся змяненні ў закон аб ахове здароўя, расказаў журналістам пра галоўныя навацыі ў гэтым дакуменце, перадае карэспандэнт БЕЛТА.

"Фактычна перад намі цяпер будзе зусім новы закон аб ахове здароўя", - адзначыў Дзмітрый Піневіч. Змяненні былі ўнесены ў палову артыкулаў. Акрамя таго, у законе з'явіліся 12 новых артыкулаў і дзве дадатковыя главы - аб інфармацыйным забеспячэнні ў галіне аховы здароўя і дзяржаўным сацыяльным заказе.

Паводле слоў міністра, абноўлены закон канстатуе эфектыўнасць выбранай мадэлі айчыннай аховы здароўя, дазваляе на заканадаўчым узроўні адказаць на сённяшнія структурныя выклікі, а таксама закладвае прававыя асновы ўдасканалення сістэмы на перыяд не менш як 7-9 гадоў.

Адна з галоўных навацый датычыцца паляпшэння сістэмы кіравання якасцю медыцынскай дапамогі. Уводзіцца новы від экспертызы - экспертыза якасці меддапамогі. З'явіцца фармакаэканамічная экспертыза для адбору найбольш эканамічна выгадных і бяспечных медыцынскіх тэхналогій.

Законам пашыраюцца магчымасці выкарыстання аддзяленняў дзённага знаходжання: пры аказанні медыцынскай дапамогі ў такіх аддзяленнях грамадзяне будуць забяспечаны лекавымі сродкамі і медыцынскімі вырабамі ў межах рэспубліканскіх фармуляраў за кошт бюджэту аналагічна знаходжанню ва ўмовах стацыянара.

Стане магчымым назначэнне пацыентам кантралюемага лячэння. Яно заключаецца ў рэгулярнай выдачы лекавых прэпаратаў для лячэння пад наглядам урачоў асобных захворванняў (напрыклад, туберкулёзу, ВІЧ, гепатыту С, рассеянага склерозу). Гэта дасць магчымасць забяспечыць аказанне медыцынскай дапамогі на працягу ўсяго курса лячэння, што асабліва актуальна для асоб, якія з-за злоўжывання алкаголем або іншых прычын не выконваюць прадпісанняў урача, растлумачылі ў Міністэрстве аховы здароўя.

"Важны кампанент - гэта ўдасканаленне сістэмы паслядыпломнай падрыхтоўкі. Прафесійная падрыхтоўка медыцынскага работніка ажыццяўляецца ў ходзе ўсёй яго дзейнасці - гэта так званая бесперапынная медыцынская адукацыя. Уваход у вузкія спецыяльнасці (кардыяхірургія, анкалогія, рэаніматалогія, анестэзіялогія) будзе ажыццяўляцца праз трохгадовую рэзідэнтуру", - расказаў міністр. Рэзідэнтура заменіць клінічную ардынатуру і дазволіць змяняць профіль спецыяльнасці для рэалізацыі існуючага прафесійнага патэнцыялу медыка.

У абноўленым законе замацавана азначэнне ўніверсітэцкай клінікі - гэта ўстанова, якая сумяшчае медыцынскую дзейнасць у якасці бальнічнай арганізацыі з удзелам у рэалізацыі адукацыйных праграм. Адукацыйны працэс і клінічная работа ажыццяўляюцца сумесна прафесарска-выкладчыцкім складам універсітэта і ўрачамі-спецыялістамі клінікі. Такі пілотны праект рэалізуецца ў Гродне, ён паказаў ужо сваю эфектыўнасць, адзначыў Дзмітрый Піневіч.

Законам створаны ўмовы для далейшага ўкаранення электроннай аховы здароўя. Плануецца, што ў 2023 годзе пачне працаваць адзіная платформа сістэмы аховы здароўя. "Туды будзе інтэгравана медыцынская картка, гэта значыць кожны з нас будзе мець свой медыцынскі кабінет", - растлумачыў кіраўнік Міністэрства аховы здароўя. Гэта дасць магчымасць медыкам больш эфектыўна абменьвацца данымі і кіраваць рэсурсамі.

Для захавання патрабаванняў да якасці і бяспекі медыцынскай дапамогі ўводзіцца медыцынская акрэдытацыя дзяржаўных арганізацый аховы здароўя, якая будзе ацэньваць лячэбна-дыягнастычныя магчымасці арганізацыі.

У медыкаў з'явіцца права на прафесійную рызыку пры выкананні розных, перш за ўсё высокатэхналагічных, умяшанняў. "Любое медыцынскае ўмяшанне заўсёды мае рызыку ўскладненняў. Гэта звязана з рознымі фактарамі, напрыклад, анатамічнымі асаблівасцямі. Часта пры надыходзе гэтай рызыкі ўзнікае нейкае недастатковае разуменне і медыцынскія работнікі становяцца вінаватымі. Тут права рызыкі ўскладаецца на ўстанову, якая абавязана забяспечыць мінімізацыю гэтай рызыкі. Гэта будзе ўваходзіць у сістэму ацэнкі стандартаў і крытэрыяў", - расказаў Дзмітрый Піневіч.

версія для друку

зрабіць стартавай

дабавіць у выбранае