Падзеі

19 мая, Мінск /Кар. БЕЛТА/. МЗС Беларусі вітае рашэнне Албаніі аб прадастаўленні магчымасці беларускім грамадзянам прыязджаць без віз у гэту краіну з 15 мая па 1 лістапада 2016 года, заявіў сёння журналістам начальнік упраўлення інфармацыі - прэс-сакратар МЗС Беларусі Дзмітрый Мірончык, перадае карэспандэнт БЕЛТА.

"Мы вітаем такія рашэнні замежных дзяржаў, паколькі яны сведчаць, што Беларусь не разглядаецца імі як крыніца нелегальнай міграцыі або іншых пагроз у сферы бяспекі", - сказаў прадстаўнік МЗС.

Дзмітрый Мірончык нагадаў, што 11 мая Савет Міністраў Албаніі прыняў пастанову, якая дае грамадзянам Беларусі магчымасць уязджаць на албанскую тэрыторыю без віз з 15 мая да 1 лістапада 2016 года. Гэта датычыцца турыстычных і прыватных паездак тэрмінам да 90 дзён.