Падзеі
МЗС Беларусі: Візіт у Мінск Петэра Сіярта будзе садзейнічаць актывізацыі беларуска-венгерскага супрацоўніцтва
23 красавіка, Мінск /Аліна Грышкевіч - БЕЛТА/. Візіт у Беларусь міністра замежных спраў і знешняга гандлю Венгрыі Петэра Сіярта стане лагічным прадаўжэннем актыўнага развіцця беларуска-венгерскага супрацоўніцтва. Аб гэтым паведаміў на брыфінгу начальнік упраўлення інфармацыі - прэс-сакратар МЗС Беларусі Дзмітрый Мірончык, перадае карэспандэнт БЕЛТА.
Петэр Сіярта будзе знаходзіцца з рабочым візітам у Мінску 29 красавіка па запрашэнні міністра замежных спраў Беларусі Уладзіміра Макея. "Бакі плануюць абмеркаваць увесь спектр пытанняў, якія датычацца стану і перспектыў беларуска-венгерскіх адносін, а таксама развіццё дыялогу па лініі Беларусь-ЕС", - расказаў Дзмітрый Мірончык.
Намеснік міністра замежных спраў Беларусі Алена Купчына, якая з'яўляецца сустаршынёй беларуска-венгерскай міжурадавай камісіі па эканамічным супрацоўніцтве, 23-24 красавіка знаходзіцца ў Будапешце. Запланаваны яе перагаворы з Петэрам Сіярта, а таксама з дзяржсакратаром офіса прэм'ер-міністра Венгрыі па справах ЕС, сустаршынёй беларуска-венгерскай міжурадавай камісіі па эканамічным супрацоўніцтве, дзяржсакратаром Міністэрства замежных спраў і знешняга гандлю Венгрыі Ласла Саба.
Бакі плануюць абмеркаваць перспектывы двухбаковага супрацоўніцтва, уключаючы падрыхтоўку чарговага пасяджэння міжурадавай камісіі гэтай восенню ў Будапешце. Размова пойдзе і аб развіцці дыялогу па лініі Беларусь-ЕС, аб падрыхтоўцы да рыжскага саміту "Усходняга партнёрства" ў маі.
Акрамя таго, Алена Купчына 24 красавіка прыме ўдзел ва ўрачыстай цырымоніі адкрыцця новага будынка пасольства Беларусі ў Венгрыі.
версія для друку
зрабіць стартавай
дабавіць у выбранае