Падзеі

Мінпрацы падтрымала рэзалюцыю Міжнароднай канферэнцыі працы па рэагаванні на крызіс з-за COVID

15 чэрвеня, Мінск /Кар. БЕЛТА/. Міністр працы і сацыяльнай абароны Ірына Касцевіч выступіла на пленарным пасяджэнні 109-й сесіі Міжнароднай канферэнцыі працы (МКП) у фармаце відэа-канферэнц-сувязі, паведамілі БЕЛТА ў ведамстве.

З 28 мая па 19 чэрвеня праходзіць 109-я сесія важнейшага форуму Міжнароднай арганізацыі працы (МАП), у рабоце якой удзельнічае трохбаковая дэлегацыя Рэспублікі Беларусь, што ўключае прадстаўнікоў урада, аб'яднанняў прафсаюзаў і наймальнікаў. У гэтым годзе дыскусія на пленарных пасяджэннях канферэнцыі прысвечана ўплыву пандэміі COVID-19 на сферу працы. У якасці асновы для абмеркавання ўдзельнікам прадстаўлены даклад генеральнага дырэктара Міжнароднага бюро працы Гая Райдэра "Праца ў часы COVID".

Выступаючы з дакладам на пленарным пасяджэнні, Ірына Касцевіч расказала пра меры сацыяльна-працоўнай палітыкі Беларусі ва ўмовах распаўсюджвання каранавіруснай інфекцыі, накіраваныя на мінімізацыю яе наступстваў, павышэнне даходаў грамадзян, падтрыманне ўстойлівасці рынку працы. Сярод названых мер - выплата спецыяльных штомесячных надбавак медыцынскім і сацыяльным работнікам; устанаўленне даплат за кошт рэспубліканскага бюджэту да мінімальнай заработнай платы работнікам, якія знаходзіліся ў рэжыме няпоўнай занятасці або прастоі; захаванне сацыяльных гарантый работнікам, якія знаходзіліся на бальнічным. У якасці важнейшай тэндэнцыі на рынку працы Беларусі ў перыяд пандэміі Ірына Касцевіч адзначыла актыўнае выкарыстанне ў сістэме працоўных адносін новых гібкіх форм занятасці, асабліва дыстанцыйнай работы.

Міністр таксама праінфармавала аб прыняцці дзяржавай дадатковых заканадаўчых мер у сферы працоўных адносін. Важнай навацыяй для аховы здароўя работнікаў стала прадастаўленне ім магчымасці ў выпадку хваравітага стану, са згоды наймальніка, выкарыстоўваць тры дні адпачынку без атрымання бальнічнага ліста. Паводле слоў міністра, прымаемыя меры далі станоўчы эфект. На працягу ўсяго перыяду пандэміі ў рэспубліцы не было перыядаў масавых звальненняў, узровень беспрацоўя склаў у 2020 годзе 4 працэнты, не было дапушчана зніжэння даходаў насельніцтва.

Ірына Касцевіч падкрэсліла захаванне актуальнасці парадку дня МАП - забеспячэнне дастойнай працы для ўсіх. У сувязі з гэтым міністр падтрымала прыняцце падагульняючага дакумента канферэнцыі па рэагаванні на крызіс, выкліканы пандэміяй COVID-19, які змяшчае дакладныя і зразумелыя арыенціры для фарміравання мер сацыяльна-эканамічнай палітыкі.

версія для друку

зрабіць стартавай

дабавіць у выбранае