Падзеі

24 мая, Мінск /Кар. БЕЛТА/. Міністр аховы здароўя Беларусі Валерый Малашка, выступаючы на 70-й сесіі Сусветнай асамблеі аховы здароўя ў Жэневе (Швейцарыя), прэзентаваў нацыянальную сістэму аховы здароўя, паведамілі карэспандэнту БЕЛТА ў прэс-службе Міністэрства аховы здароўя.

У сваёй прамове міністр, у прыватнасці, адзначыў, што дзяржавай забяспечана стабільнае фінансаванне галіны. На працягу апошніх 10 гадоў яно складае амаль 4 працэнты ВУП. Гэта з'яўляецца важнейшай умовай для ўстойлівасці сістэмы і своечасовага рэагавання на пастаянна ўзнікаючыя выклікі. Насельніцтва забяспечваецца меддапамогай за кошт бюджэтных сродкаў на аснове сацыяльных стандартаў.

За апошнія гады для ўмацавання сістэмы аховы здароўя ў Беларусі праведзена работа па ўдасканаленні заканадаўства, абнаўленні матэрыяльна-тэхнічнай базы. Развівалася першасная меддапамога з павелічэннем долі яе фінансавання, паляпшалася даступнасць спецыялізаванай меддапамогі з нарошчваннем аб'ёмаў высокатэхналагічнай меддапамогі. У прыярытэце застаецца ахова здароўя маці і дзіцяці, экспарт медпаслуг, прафілактыка неінфекцыйных захворванняў.

Дзякуючы гэтаму палепшаны асноўныя медыка-дэмаграфічныя паказчыкі. Так, у рэспубліцы стабільна нізкі ўзровень дзіцячай смяротнасці (у 2016 годзе - 3,2 на 1 тыс. жыванароджаных), смяротнасці дзяцей ва ўзросце да 5 гадоў (4,1 на 1 тыс. жыванароджаных), мацярынскай смяротнасці (1,7 на 100 тыс. жыванароджаных). У 2016 годзе каэфіцыент нараджальнасці склаў 12,4 на 1 тыс. насельніцтва, каэфіцыент агульнай смяротнасці - 12,6 на 1 тыс.

"Сёння ўсе мы салідарны з тым, што фарміраванне стратэгіі па захаванні і ўмацаванні здароўя грамадзян павінна ісці праз стварэнне адзінага прафілактычнага асяроддзя і падтрымку здароўя на ўсіх этапах жыцця чалавека", - адзначыў Валерый Малашка. Гэтыя прынцыпы адлюстраваны ў Мінскай дэкларацыі, прынятай у кастрычніку 2015 года на Еўрапейскай міністэрскай канферэнцыі "Ахоп усіх этапаў жыцця ў кантэксце палітыкі "Здароўе - 2020", і пакладзены ў аснову дзяржпраграмы "Здароўе народа і дэмаграфічная бяспека Рэспублікі Беларусь" на 2016-2020 гады.

Сесія Сусветнай асамблеі аховы здароўя праходзіць 22-31 мая. На ёй разглядаюцца пытанні ўдасканалення сістэм аховы здароўя, якія садзейнічаюць дасягненню Мэт развіцця тысячагоддзя ў галіне ўмацавання сістэм аховы здароўя.

Сусветная асамблея аховы здароўя з'яўляецца вышэйшым органам СААЗ.