Падзеі
Макей зрабіў запіс у Кнізе спачуванняў пасольства Францыі ў Беларусі ў сувязі з тэрактам
9 студзеня, Мінск /Кар. БЕЛТА/. Сёння міністр замежных спраў Беларусі Уладзімір Макей наведаў пасольства Францыі ў Беларусі і зрабіў запіс у Кнізе спачуванняў у сувязі з гібеллю людзей у выніку тэракта ў рэдакцыі французскага часопіса Charlie Hebdo 7 студзеня 2015 года ў Парыжы. Аб гэтым БЕЛТА паведамілі ў прэс-службе беларускага знешнепалітычнага ведамства.
У сваім запісе міністр адзначыў, што Беларусь рашуча асуджае гэту варварскую акцыю, а таксама любыя праявы тэрарызму і экстрэмізму, ахвярамі якіх становяцца мірныя грамадзяне.
Як паведамлялася, тэракт у рэдакцыі Charlie Hebdo ўчынілі трое злачынцаў, узброеных аўтаматамі Калашнікава і ручным гранатамётам. Уварваўшыся ў будынак, яны адкрылі агонь, забіўшы 12 чалавек. Сярод іх - 10 супрацоўнікаў выдання і 2 паліцэйскія. Яшчэ 11 чалавек атрымалі раненні, чацвёра - цяжкія.
Французская паліцыя распаўсюдзіла фатаграфіі двух братоў, падазроных ва ўчыненні ўзброенага нападзення на Charlie Hebdo. Агенцтва France-Presse са спасылкай на ўласныя крыніцы паведаміла, што адзін з падазроных у тэракце здаўся паліцыі.
Тысячы жыхароў Францыі, шакіраваныя тым, што здарылася, выйшлі вечарам 7 студзеня на вуліцы. У стыхійна арганізаваных мітынгах на буйнейшых гарадскіх плошчах прынялі ўдзел больш за 100 тыс. чалавек. У Парыжы маніфестацыя прайшла на плошчы Рэспублікі, недалёка ад якой знаходзіцца рэдакцыя штотыднёвіка Charlie Hebdo.
Салідарнасць парыжанам выказалі таксама жыхары Рэна, Тулузы, Ліона, Ліля, Марсэля і іншых гарадоў, дзе прайшлі шматтысячныя народныя маніфестацыі.
Трагедыя ў Парыжы выклікала рэзкую рэакцыю ў свеце. Міжнародная супольнасць аднагалосна асудзіла дзеянні злачынцаў і выказала падтрымку ўладам і народу Францыі.
версія для друку
зрабіць стартавай
дабавіць у выбранае