Падзеі

Макей: Беларусь разглядае ўзаемадзеянне з краінамі Азіі ў якасці прыярытэту знешняй палітыкі

Фота з архiва

12 кастрычніка, Мінск /Кар. БЕЛТА/. Беларусь разглядае ўзаемадзеянне з краінамі Азіі ў якасці прыярытэту сваёй знешняй палітыкі. Аб гэтым заявіў кіраўнік Міністэрства замежных спраў Уладзімір Макей, выступаючы на 6-й сустрэчы міністраў замежных спраў краін - членаў Нарады па ўзаемадзеянні і мерах даверу ў Азіі (НУМДА) 12 кастрычніка ў Нур-Султане, паведамляе карэспандэнт БЕЛТА.

"Тут цесна пераплецены гандлёва-эканамічныя сувязі з нашымі партнёрамі па Еўразійскім саюзе. З'яўляючыся членам Арганізацыі Дагавора аб калектыўнай бяспецы, наша краіна зацікаўлена ва ўмацаванні калектыўнай бяспекі Цэнтральна-Азіяцкага рэгіёна", - расказаў кіраўнік беларускага МЗС.

Ён таксама заўважыў: "Мы прадметна ўзаемадзейнічаем з партнёрамі па лініі ШАС. Гатовы больш актыўна ўдзельнічаць у мерапрыемствах НУМДА".

У ходзе пленарнага пасяджэння была адзначана ўзрастаючая глабальная роля нарады ў развіцці ўзаемадзеяння ў азіяцкім рэгіёне, павышэнні ўзроўню бяспекі і ўмацаванні мер даверу паміж дзяржавамі. Падтрымана ініцыятыва аб трансфармацыі НУМДА ў поўнафарматную міжнародную арганізацыю з захаваннем фундаментальных прынцыпаў яе функцыянавання.

На палях мерапрыемства адбыўся таксама шэраг сустрэч і кантактаў з міністрамі замежных спраў Манголіі, Узбекістана, Туркменістана, Кыргызстана, міністрам турызму Ізраіля, спецыяльным прадстаўніком генеральнага сакратара ААН па Цэнтральнай Азіі Наталляй Герман і іншымі. Абмеркаваны пытанні двухбаковага супрацоўніцтва, узаемадзеяння па актуальных пытаннях міжнароднага парадку дня, узаемнай падтрымкі ў міжнародных арганізацыях.

Нарада па ўзаемадзеянні і мерах даверу ў Азіі заснавана ў 1992 годзе. Асноўная мэта НУМДА - умацаванне супрацоўніцтва шляхам выпрацоўкі шматбаковых падыходаў да забеспячэння міру, бяспекі і стабільнасці ў Азіі. Нарада аб'ядноўвае дваццаць сем краін. Дзевяць краін (у тым ліку Рэспубліка Беларусь) і пяць міжнародных арганізацый маюць статус наглядальнікаў.

версія для друку

зрабіць стартавай

дабавіць у выбранае