Падзеі

26 верасня, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка шкадуе аб тым, што Вялікабрытанія выходзіць з Еўрасаюза, з пункту гледжання развіцця беларуска-еўрапейскіх адносін у цэлым. Аб гэтым ён заявіў сёння на сустрэчы з дзяржаўным міністрам па справах Еўропы і Амерыкі МЗС Вялікабрытаніі Аланам Дунканам, перадае карэспандэнт БЕЛТА.

"Ведаеце, аб чым я падумаў, заходзячы ў гэту залу на сустрэчу з вамі? Па-першае, нарэшце высокапастаўлены чалавек, член урада вельмі развітой краіны вырашыў прыехаць у Беларусь. Новы добры знак, - сказаў кіраўнік дзяржавы. - Па-другое (можа, вам гэта не спадабаецца), я падумаў, вельмі шкада, што Вялікабрытанія ў гэты момант выходзіць з Еўрапейскага саюза. У нас быў бы надзейны добры партнёр і сябар у Еўрасаюзе, які мог бы сказаць праўду пра Беларусь".

Алан Дункан падзякаваў кіраўніку беларускай дзяржавы за каментарый адносна выхаду Вялікабрытаніі з Еўрасаюза. "Мне даводзіцца ўвесь час растлумачваць праблемы, з якімі сутыкаецца Вялікабрытанія, і тлумачыць тым краінам, якія імкнуцца ўвайсці ў Еўрасаюз, у той час як сама Вялікабрытанія з ЕС выходзіць", - адзначыў ён.