Падзеі

Лукашэнка павіншаваў Сі Цзіньпіна з юбілеем

15 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў Старшыню Кітайскай Народнай Рэспублікі Сі Цзіньпіна з 65-годдзем. Аб гэтым БЕЛТА паведамілі ў прэс-службе беларускага лідара.

"Вы адкрылі новую старонку ў развіцці Кітайскай Народнай Рэспублікі - эпоху рэалізацыі мары аб вялікім адраджэнні кітайскай нацыі і пабудове сярэднезаможнага грамадства, новую эпоху сацыялізму з кітайскай спецыфікай. Станоўчыя змены, якія адбыліся за апошнія некалькі гадоў ва ўнутры- і знешнепалітычным жыцці Вялікага Кітая, удыхнулі свежую сілу і ў беларуска-кітайскія адносіны. Ганаруся тым, што наша асабістае сяброўства і партнёрства паміж дзвюма краінамі з кожным годам становяцца ўсё мацнейшымі", - гаворыцца ў віншаванні.

Кіраўнік дзяржавы выказаў падзяку за запрашэнне прыняць удзел у саміце Шанхайскай арганізацыі супрацоўніцтва, які нядаўна адбыўся ў горадзе Цындаа. "Павінен адзначыць, што перыяд работы "сям'і ШАС" у пашыраным складзе аказаўся паспяховым у многім дзякуючы намаганням Кітая, які старшынстваваў у арганізацыі. Ініцыятывы, агучаныя Вамі ў праграмным выступленні на саміце, яшчэ больш умацавалі аўтарытэт Кітайскай Народнай Рэспублікі як адказнай дзяржавы і наглядна прадэманстравалі сусветнай грамадскасці аб'яднальную сілу "дыпламатыі вялікай дзяржавы з кітайскай спецыфікай", - падкрэсліў Прэзідэнт.

Паводле слоў Аляксандра Лукашэнкі, вынікі дзейнасці за мінулы год пераканалі ўвесь свет у тым, што Шанхайская арганізацыя супрацоўніцтва паступова ператвараецца з рэгіянальнай арганізацыі ў глабальную структуру, мэтай якой з'яўляецца забеспячэнне бяспекі і стабільнасці ўсёй міжнароднай супольнасці.

"Упэўнены, што дасягнутыя ў ходзе нашай двухбаковай сустрэчы дамоўленасці нададуць новы моцны імпульс супрацоўніцтву Беларусі і Кітая і будуць садзейнічаць далейшаму развіццю міждзяржаўнага дыялогу. Ад імя беларускага народа і ад сябе асабіста жадаю Вам нязменных поспехаў на шляху хутчэйшага дасягнення "мэт двух стагоддзяў" на карысць дружалюбнага кітайскага народа", - адзначыў беларускі лідар.

версія для друку

зрабіць стартавай

дабавіць у выбранае